02 Jun 2025
(ویب ڈیسک) ماضی کے مقبول ڈرامے’’عینک والا جن‘‘ کو ہائی ڈیفینیشن ویڈیوفارمیٹ میں دوبارہ یوٹیوب پر ریلیز کردیا گیا۔
عینک والا جن کو ابتدائی طور پر 1993ء سے 1996 ء کے دوران پی ٹی وی لاہور سنٹر سے نشر کیا گیا تھا، جسے بعد ازاں 2005ء اور 2008ء کے درمیان بھی نشر کیا گیا۔کوہ قاف کے جنوں، پریوں اور جادوگروں کی کہانیوں پر مبنی اس ڈرامے کی ہدایات حفیظ طاہر نے دی تھیں اور اسے زیب شہزاد نے پروڈیوس کیا تھا، یہ ڈراما نہ صرف بچوں کو تفریح فراہم کرتا تھا بلکہ اخلاقی درس بھی دیتا تھا۔
اس کی مقبولیت کو دیکھتے ہوئے ڈرامے کا ریمیک بھی بنایا گیا، جسے یوٹیوب پر ریلیز کیا گیا تھا اور اب پی ٹی وی نے پہلے ہی ڈرامے کو ایچ ڈی فارمیٹ میں یوٹیوب پر دوبارہ ریلیز کردیا ہے۔پی ٹی وی کی جانب سے اپنے یوٹیوب ڈیجیٹل چینل پر ڈرامے کو دوبارہ ریلیز کیا گیا ہے اور اس کی یومیہ ایک قسط ریلیز کی جاتی ہے۔
ڈرامے کی یوٹیوب پر دوبارہ واپسی پر بچوں سمیت والدین بھی خوش دکھائی دیتے ہیں جو اپنے بچوں کو اپنے بچپن کا ڈراما دیکھتا دیکھ کر خوش ہو رہے ہیں۔یاد رہے کہ عینک والا جن میں کردار ادا کرنے والے متعدد اداکار انتقال کر چکے ہیں،زکوٹا کا کردار ادا کرنے والے اداکار مطلوب الرحمن المعروف منا لاہوری فروری 2018 میں انتقال کر گئے تھے،ان سے پہلے بل بتوڑی کا کردار ادا کرنے والی نصرت آرا بیگم اکتوبر 2017 میں انتقال کرگئی تھیں۔
آپ کی اس خبر کے متعلق رائے
