وزیر اعظم شہباز شریف نے کہا کہ ہمیں پاکستان اور ترکیہ کے صدیوں پر محیط برادرانہ تعلقات پر فخر ہے، ترکیہ کے صدر رجب طیب ایردوان کے حالیہ دورہ پاکستان سے دونوں ممالک کے اقتصادی تعلقات میں مزید بہتری آئے گی۔

شہباز شریف نے ترکیہ کے وزیر توانائی اور اعلیٰ سطحی وفد کا پاکستان منرلز انویسٹمنٹ سمٹ میں شرکت پر شکریہ ادا کیا اور کہا کہ دونوں ممالک کے معاشی تعلقات کو نئی وسعت دینے کے کثیر مواقع موجود ہیں۔

وزیر اعظم  نے کہا کہ ترکیہ اور پاکستان کے درمیان سمندر میں تیل اور گیس کی تلاش کے حوالے سے تعاون کے معاہدے سے دونوں ممالک کے اقتصادی تعلقات کو مزید تقویت ملے گی، دونوں ممالک نے توانائی کے شعبے بالخصوص قابل تجدید توانائی میں تعاون بڑھانے پر اتفاق کیا۔

ترکیہ کے وفد نے پاکستان میں توانائی کے شعبے میں جاری اصلاحات کی تعریف کی، ترک وزیر توانائی  نے کہا کہ توانائی، بالخصوص بجلی کے شعبے میں اصلاحات اور نجکاری کے سلسلے میں ترکیہ اپنا کامیاب تجربہ پاکستان کے ساتھ شیئر کرے گا۔

ترک وزیر توانائی نے کہا کہ توانائی کے شعبے میں جاری اصلاحات اس شعبے کو سرمایہ کاری کے لیے مزید پرکشش بنائیں گی، ترک وزیر  نے پاکستان میں معدنیات کے شعبے بالخصوص نادر معدنیات کی دریافت میں گہری دلچسپی کا اظہار کیا۔

ترکیہ کے وزیر توانائی و قدرتی وسائل الپرسلان بائیرقطار  نے کہا کہ پاکستان منرلز انویسٹمنٹ سمٹ میں شرکت سے پاکستان میں اس شعبے کی وسیع استعداد کا درست اندازہ ہوا، ملاقات میں نائب وزیر اعظم و وزیر خارجہ محمد اسحاق ڈار، وزیر بجلی اویس لغاری، وزیر پٹرولیم علی پرویز ملک، معاون خصوصی طارق فاطمی اور اعلیٰ سرکاری حکام شریک تھے۔