(لاہور نیوز) محکمہ کھیل حکومت بلوچستان کے زیراہتمام صوبہ بھر میں جاری سپورٹس فیسٹیول میں یوم پاکستان کی مناسبت سے کھیلوں کے مقابلے جاری ہیں۔

کھیلوں میں شامل فٹسال ٹورنامنٹ، ووشو ٹورنامنٹ، باسکٹ بال کے مقابلوں کا بھی آغاز ہوگیا، فٹسال ٹورنامنٹ کا آغاز کوئٹہ کے علاقے سیٹلائٹ ٹاؤن کیو ڈی اے گراؤنڈ میں ہوا، افتتاحی تقریب کے مہمان خاص پاکستان پیپلزپارٹی کے رہنما رکن اسمبلی پارلیمانی سیکرٹری لیاقت علی لہڑی تھے۔

باسکٹ بال کے مقابلے پاکستان سپورٹس بورڈ کوئٹہ سینٹر میں شروع ہوگئے، جس کا افتتاح بلوچستان اولمپک ایسوسی ایشن کے جنرل سیکرٹری شیر محمد ترین نے کیا، ووشو کے مقابلے ایوب سپورٹس کمپلیکس مارشل آرٹس جمنیزیم میں شروع ہوئے ہیں۔

باسکٹ بال کے مقابلوں میں کوئٹہ کی 6 ٹیموں نے حصہ لیا، ووشو کے مقابلوں میں 7 مختلف ویٹ کیٹیگریز ہیں جن میں کوئٹہ سے 35 کھلاڑیوں نے حصہ لیا، فٹسال ٹورنامنٹ کے مہمان خصوصی میر لیاقت علی لہڑی نے باقاعدہ طور پر ٹورنامنٹ کا افتتاح کیا، آرگنائزنگ کمیٹی کے ممبر عبدالباقی، محمد صادق سمیت تماشائی بھی بڑی تعداد میں موجود تھے۔

افتتاحی تقریب کے موقع پر مہمان خصوصی کا کھلاڑیوں سے خصوصی تعارف بھی کرایا گیا، لیاقت علی لہڑی نے میڈیا سے بات چیت کرتے ہوئے کہا  کہ 23 مارچ یوم پاکستان کی مناسبت سے سپورٹس فیسٹول کا انعقاد خوش آئند ہے، اس سے کھلاڑیوں کو کھیلنے کے مواقع میسر آئیں گے۔

ان کا مزید کہنا تھا کہ بلوچستان حکومت کھیلوں کے فروغ اور کھلاڑیوں کو کھیلنے کے مواقع فراہم کرنے کے لئے کوشاں ہے۔ انہوں نے کہا  کہ کیو ڈی اے گراؤنڈ میں مصنوعی گراس لگانے کے لئے آئندہ مالی سال کے پی ایس ڈی میں شامل کریں گے۔

لیاقت علی لہڑی نے کہا  کہ صوبے میں امن و امان کی مخدوش صورتحال کے باوجود تماشائیوں کی بڑی تعداد میں میچ دیکھنے کے لئے گراؤنڈ میں موجودگی قابل تحسین ہے، اپنے نوجوانوں کو کھیلوں کی طرف راغب کریں گے تاکہ وہ منشیات جیسی لعنت سے بچ سکیں اور کھیلوں میں حصہ لیکر اپنے ملک اور صوبے کا نام روشن کریں۔

Follow Lahore News on Twitter

Install our App