(ویب ڈیسک) بی سی سی آئی کے نائب صدر راجیو شکلا نے کہا ہے کہ پاکستانی کھلاڑیوں کی آئی پی ایل میں شرکت فرنچائزز پر منحصر ہے۔
حال ہی میں راجیو شکلا ایک پوڈ کاسٹ میں شریک ہوئے جہاں انہوں نے آئی پی ایل میں پاکستانی کرکٹرز کی شرکت اور پاک بھارت کرکٹ سیریز کے حوالے سے بات کی۔
پاکستانی کرکٹرز کی آئی پی ایل میں عدم شرکت کے حوالے سے پوچھے گئے ایک سوال کے جواب میں راجیو شکلا کا کہنا تھا کہ پاکستانی کمنٹیٹرز اور امپائرز کو ہم نے آئی پی ایل میں شامل کیا، البتہ جہاں تک کھلاڑیوں کا تعلق ہے اس کا انحصار فرنچائزز پر ہے۔
انہوں نے کہا کہ فرنچائزز پاکستانی کھلاڑیوں کو منتخب نہیں کرتیں اور ہم بھی انہیں نیلامی کی فہرست میں شامل نہیں کرتے، کچھ فرنچائزز پاکستانی کھلاڑیوں کے حوالے سے بات کرتی ہیں لیکن مجموعی طور پر ان کو شامل کرنے کے حوالے سے حالات مشکل نظر آ رہے ہیں۔
پاک بھارت سیریز کے حوالے سے پوچھے گئے ایک سوال کے جواب میں نائب صدر بی سی سی آئی کا کہنا تھا کہ اس وقت ہمیں حکومت کی طرف سے اجازت نہیں ہے، فی الحال نیوٹرل وینیو پر بھی دو طرفہ سیریز کرانے کی اجازت نہیں ہے۔
