(لاہور نیوز) وزیر اعلیٰ پنجاب مریم نواز نے کہا ہے کہ سی پیک محض ایک منصوبہ نہیں، دو قوموں کے لئے امید، ترقی اور خوشحالی کی علامت ہے۔

وزیراعلیٰ پنجاب مریم نواز  نے عوامی جمہوریہ چین کے 75 ویں قومی دن کی تقریب میں شرکت کی اور چینی قونصل جنرل ژاؤ شیریں سے ملاقات کر کے قومی دن پر مبارک باد دی۔

تقریب سے خطاب کرتے ہوئے مریم نواز  نے کہا کہ چین کے قومی دن پر پاکستان کے لوگوں کی طرف سے مبارکباد پیش کرتی ہوں، پنجاب کے لوگ چینی بھائی بہنوں کو دلی مبارکباد پیش کرتے ہیں۔

انہوں نے کہا کہ چینی قوم نے ترقی کے ساتھ ساتھ دنیا کی طرف دوستی کا ہاتھ بھی بڑھایا، سی پیک پاکستان کے معاشی منظر نامے کو تبدیل کر رہا ہے، پاور کوریڈور سے لے کر عام شہریوں کے دلوں تک چین نے گھر کر لیا ہے۔

مریم نواز کا کہنا ہے کہ چین کی عظمت امن، تعاون اور انسانیت کی بھلائی کے غیر متزلزل عزم میں مضمر ہے، ہم عظیم چینی قوم کا احترام کرتے ہیں، چین کی کامیابیاں ہمارے لئے بھی حوصلہ افزائی اور قابل تقلید ہیں۔

وزیر اعلیٰ پنجاب نے کہا کہ ضرورت کی ہر گھڑی میں چین پاکستان کے ساتھ کھڑا رہا ہے، پاکستان اور چین خوشحالی اور پُرامن مستقبل کی طرف ہاتھ تھام کر آگے بڑھ رہے ہیں۔ 

ان کا کہنا ہے کہ چین ایک ایسے رہنما کے طور پر ابھرا جس کا وژن سرحدوں سے ماورا ہے، پاک چین دوستی کا بانڈ محض اسٹریٹجک مفادات پر نہیں، یہ دل اور روح کا رشتہ ہے، ہمارے مشترکہ مستقبل کا ایک اہم ترین ثبوت چین پاکستان اکنامک کوریڈور ہے۔

چینی قونصل جنرل نے خطاب میں وزیرِ اعلیٰ پنجاب کے عوام دوست اقدامات کو خراج تحسین پیش کرتے ہوئے نواز شریف آئی ٹی سٹی، کینسر ہسپتال، ایئر ایمبولینس اور اپنی چھت اپنا گھر پروگرام کا ذکر کیا۔

چینی قونصل جنرل ژاؤ شیریں نے اپنے خطاب میں مزید کہا ہے کہ سولر پینل پروگرام سے پنجاب کے عوام کو حقیقی ریلیف ملے گا۔

Subscribe Lahore News on YouTube

Install our App