(لاہور نیوز) وزیراعلیٰ پنجاب مریم نواز شریف کی قیادت میں پراونشل ڈیزاسٹر مینجمنٹ اتھارٹی (پی ڈی ایم اے) پنجاب نے سو روز میں اہم سنگ میل عبور کر لیے۔

ڈائریکٹر جنرل پی ڈی ایم اے عرفان علی کاٹھیا نے ادارے کی سو روزہ کارکردگی رپورٹ جاری کر دی۔ رپورٹ میں بتایا گیا ہے کہ خیبر پختونخوا میں بارشوں سے متاثرہ 2500 خاندانوں کی مدد کیلئے راشن بیگز کے 6 ٹرکس بھیجے گئے، پنجاب میں آسمانی بجلی گرنے سے 32 شہری جاں بحق ہوئے ، وزیراعلیٰ پنجاب کی ہدایات پر متاثرین کو بلاتاخیر مالی معاونت فراہم کی گئی۔

ڈی جی پی ڈی ایم اے نے مزید بتایا کہ بارشوں اور آگ سے متاثرہ فصلوں کیلئے کسانوں کی بھی مالی معاونت کی گئی ، ہیٹ ویو سے بچاؤ کیلئے صوبے بھر میں موثر اقدامات کیے گئے ، چولستان کے باسیوں کو صاف پینے کے پانی کیلئے واٹر باؤزر فراہم کیے گئے۔

ڈی جی عرفان علی کاٹھیا کے مطابق ممکنہ سیلاب کے پیش نظر تمام اضلاع میں موک ایکسرسائزز کا اہتمام کیا گیا، پاک آرمی و ریسکیو اداروں کو سفارشات کے مطابق بوٹس، لائف جیکٹس، کیمپس و دیگر ضروری سامان فراہم کیا گیا۔ وزیراعلیٰ پنجاب کی خصوصی ہدایات پر محکمہ جنگلات کو فائر فائٹنگ کا سامان مہیا کیا گیا۔

ڈی جی عرفان علی کاٹھیا کا مزید کہنا ہے کہ مری میں جنگلات و سیاحوں کے تحفظ کیلئے خصوصی اقدامات اٹھائے گئے، مری میں لینڈ سلائیڈنگ سے متاثرہ گھروں کی تعمیرات کیلئے شہریوں کو مالی معاونت فراہم کی گئی ، موسمیاتی تبدیلی کے پیش نظر تھنک ٹینک گرین سیور کا قیام عمل میں لایا گیا، تھنک ٹینک کے باعث سموگ کنٹرول میں خاطر خواہ فائدہ ہوگا، وزیر اعلیٰ پنجاب مریم نواز شریف کی ہدایات کے مطابق پی ڈی ایم اے ہر مشکل گھڑی میں شہریوں کے شانہ بشانہ ہے۔

Subscribe Lahore News on YouTube

Install our App