(لاہور نیوز) سپیکر پنجاب اسمبلی ملک محمد احمد خان نے کہا ہے کہ پاکستانیوں کے دل کشمیری بہن بھائیوں کےساتھ دھڑکتے ہیں۔

سپیکر پنجاب اسمبلی ملک محمد احمد خان سے سابق وزیراعظم آزاد کشمیر راجہ فاروق حیدر نے وفد کے ہمراہ اسمبلی چیمبر میں ملاقات کی،  ڈپٹی سپیکر پنجاب اسمبلی ملک ظہیر اقبال چنڑ بھی اس موقع پر موجود تھے۔

کشمیری وفد میں  آزاد کشمیر سے سینئر وزیر کرنل وقار نور، وزیر تعمیرات عامہ چودھری اظہر صادق،سیکرٹری اسمبلی چودھری بشارت حسین سمیت دیگر افسران شامل تھے ، سپیکر ملک محمد احمد خان نے کشمیریوں کی ترقی کے لیے سابق وزیراعظم آزاد کشمیر راجہ فاروق حیدر کی کاوشوں کو سراہا۔

اس موقع پر گفتگو کرتے ہوئے سپیکر ملک احمد خان کا کہنا تھا کہ  وزیراعظم شہباز شریف کے بروقت اقدامات سے کشمیر میں امن و امان کی صورتحال بہتر ہوئی، وزیراعظم نے کشمیری بھائیوں کے مسائل کے حل کے لیے مالی وسائل فراہم کئے۔

انہوں نے کہا کہ یہ کیسے ممکن ہے  آزاد کشمیر میں بہن بھائی مشکل میں ہوں اور ہم چین سے بیٹھیں، پاکستان ہمیشہ کشمیریوں کی اخلاقی، سیاسی اور سفارتی حمایت جاری رکھے گا۔

سابق وزیراعظم آزاد کشمیر راجہ فاروق حیدر نے کہا کہ مظفرآباد اور لاہور کا تعلق بہت پرانا ہے، پاکستانی عوام بالخصوص لاہوریوں نے ہمیشہ کشمیریوں کے ساتھ اپنی والہانہ محبت کا اظہار کیا۔

راجہ فاروق حیدر کا مزید کہنا تھا کہ وزیراعلیٰ پنجاب کی انتھک محنت سے پنجاب میں فرق نظر آرہا ہے ،آزاد کشمیر اسمبلی کی تعمیر پنجاب اسمبلی کی جدید نئی بلڈنگ اور ایوان کی طرز پر کرنا چاہتے ہیں۔

ملک محمد احمد خان نے وفد کو آزاد کشمیر اسمبلی کی تعمیر میں پنجاب اسمبلی کی جانب سے مکمل تعاون کی یقین دہانی کروائی اور وفد کو پنجاب اسمبلی کی نئی بلڈنگ اور ایوان کا دورہ بھی کروایا۔

Subscribe Lahore News on YouTube

Install our App