(لاہور نیوز) نگران وزیراعلیٰ پنجاب محسن نقوی نے کہا ہے کہ تاجر اور صنعتکار ملکی معیشت کی بہتری کے لئے قابل عمل کردار ادا کرسکتے ہیں۔

وزیراعلیٰ محسن نقوی کی زیر صدارت پنجاب چیمبرز آف کامرس کوآرڈینیشن کمیٹی کاتیسرا اجلاس ہوا جس میں  صوبائی کابینہ ارکان، چیف سیکرٹری، انسپکٹرجنرل پولیس اورمتعلقہ سیکرٹریز شریک ہوئے، چیمبرز آف کامرس کوآرڈینیشن کمیٹی کے شرکاء نے محسن نقوی کی بے مثال کارکردگی پر انہیں خراج تحسین پیش کیا۔

چیمبرز آف کامرس کوآرڈینیشن کمیٹی کے ارکان نے کہا کہ پنجاب میں 6 بزنس فیسیلی ٹیشن سنٹرز کا قیام وزیراعلیٰ محسن نقوی کا کریڈٹ ہے۔

اجلاس کے دوران صنعتکاروں اور تاجر برادری کے صدور اور عہدیداران نے کاروبار کے فروغ کے لئے تجاویز اور سفارشات پیش کیں، وزیراعلیٰ محسن نقوی نے تجاویز کو نوٹ کیا اور قابل عمل تجاویز پر عملدرآمد کی یقین دہانی کرائی۔

اس موقع پر گفتگو کرتے ہوئے وزیراعلیٰ محسن نقوی کا کہنا تھا کہ تاجر اور صنعتکار ملکی معیشت کی بہتری کے لئے قابل عمل کردار ادا کرسکتے ہیں، ویمن انٹر پرینور کے لئے ریسورس سنٹر قائم کرنے کا جائزہ لیں گے، پنجاب کے ہر ڈویژن میں بزنس فیسیلی ٹیشن سنٹرز قائم کئے جارہے ہیں۔

انہوں نے کہا کہ 45 دن میں 6بزنس فیسیلی ٹیشن سنٹرز قائم کرکے  فعال کر دئیے ہیں، بزنس فیسیلی ٹیشن سنٹر پر 22صوبائی اور 2 وفاقی محکموں کے کاؤنٹرز خدمات فراہم کررہے ہیں،بزنس فیسیلی ٹیشن سنٹر کے قیام سے صنعتکاروں کو 124این او سی ایک چھت تلے میسر ہوں گے۔

محسن نقوی کا کہنا تھا کہ ہم نے آخری پانچ ماہ میں بزنس کمیونٹی کیلئے بھر پورکوششیں کیں، ہم ایک بی ایف سی کی ایپ بنارہے ہیں، بی ایف سی ایپ کے ذریعے کاروباری افراد این او سی اپلائی کرسکتے ہیں، آئندہ چند دنوں میں بی ایف سی ایپ کے تحت فائدہ اٹھایا جاسکے گا۔

انہوں نے مزید کہا کہ ہم نے کئی مسائل کو حل کرنے کا موقع پر فیصلہ کیا، جو بھی ممکن ہوا ہماری پوری ٹیم نے مل کر کیا۔

Subscribe Lahore News on YouTube

Install our App