(لاہور نیوز) حکومتِ پنجاب نے نئی آباد ہونے والی ہاؤسنگ سکیموں کے لیے اہم فیصلہ کرتے ہوئے فیروزپور روڈ، کاہنہ، ایل ڈی اے سٹی اور ملحقہ آبادیوں میں سیوریج ٹریٹمنٹ پلانٹ قائم کرنے کی منظوری دے دی ۔
منصوبے کے تحت ہڈیارہ ڈرین پر لاہور کا پہلا باقاعدہ سیوریج ٹریٹمنٹ پلانٹ تعمیر کیا جائے گا، جو 400 کنال سے زائد رقبے پر محیط ہوگا۔ منصوبے کی مکمل فنڈنگ پنجاب حکومت فراہم کرے گی اور اس سے ہڈیارہ ڈرین میں گندے پانی کے اخراج میں نمایاں کمی متوقع ہے۔
اس منصوبے کی ابتدائی منظوری 2017-18 میں دی گئی تھی اور اب ایل ڈی اے کے سی ایم پی، شعبہ انجینئرنگ اور نیسپاک مشترکہ طور پر منصوبے کا پلان تیار کریں گے۔ ایل ڈی اے کی گورننگ باڈی نے بھی منصوبے کی منظوری کی سفارش کر دی ہے۔
ماہرین کا کہنا ہے کہ منصوبے کی تکمیل سے نہ صرف ماحولیاتی آلودگی میں کمی آئے گی بلکہ زیر زمین پانی کے تحفظ میں بھی مدد ملے گی۔
یہ اقدام لاہور میں شہری انفراسٹرکچر کی بہتری اور ماحول دوست اقدامات کی جانب ایک اہم قدم ہے۔
