07 Nov 2025
(لاہور نیوز) ایل ڈی اے کے ترجمان نے بھاٹی چوک میں تجاوزات کے خلاف کئے گئے آپریشن کے دوران جانوروں اور پرندوں کی ہلاکت کی خبروں کو سختی سے مسترد کر دیا ہے۔
ترجمان کے مطابق سوشل میڈیا پر گردش کرنے والی یہ خبریں بے بنیاد، من گھڑت اور گمراہ کن ہیں، دو روز قبل ایل ڈی اے، ٹیپا، اوقاف اور ضلعی انتظامیہ کی مشترکہ ٹیموں نے بھاٹی چوک کے قریب 16 کنال سرکاری اراضی تجاوزات سے کلیئر کرانے کیلئے آپریشن کیا تھا، اس آپریشن کا مقصد قبضہ مافیا کے خلاف کارروائی اور عوامی زمین کی واگزاری تھا۔
ترجمان نے وضاحت کی کہ آپریشن سے قبل ایل ڈی اے اور ٹیپا کی ٹیموں نے دکانداروں کے ساتھ مل کر سامان، جانوروں اور پرندوں کو بحفاظت منتقل کیا، آپریشن کے دوران جانوروں یا پرندوں کی ہلاکت کی خبریں جھوٹ پر مبنی ہیں اور ان کا حقیقت سے کوئی تعلق نہیں۔
