(لاہور نیوز) وزیراعلیٰ پنجاب نے خصوصی بچوں کی تعلیم کے لئے 48 نئی بسوں، ہمت کارڈ میں شمولیت اور دنیا بھر سے ماہرین آٹزم کی خدمات حاصل کرنے کی منظوری دے دی۔

وزیراعلیٰ پنجاب مریم نواز شریف کی زیر صدارت سپیشل ایجوکیشن کے حوالے سے اہم اجلاس ہوا جس میں بتایا گیا کہ پنجاب کی تاریخ میں پہلی مرتبہ مختصر ترین مدت میں خصوصی بچوں کے 5 ہزار سے زائد داخلے کا نیا ریکارڈ قائم ہوا ہے۔

وزیراعلیٰ مریم نواز شریف کی جانب سے معاون خصوصی ثانیہ عاشق اور پوری ٹیم کو شاندار کارکردگی پر خراجِ تحسین پیش کیا گیا، غریب بچوں کو مریم نواز آٹزم سکول میں مکمل طور پر مفت تھراپی اور تعلیم دی جائے گی۔

اجلاس میں دنیا بھر سے بہترین ماہرین آٹزم کی خدمات حاصل کرنے کا فیصلہ کیا گیا، خصوصی بچوں کو ہمّت کارڈ پروگرام میں شامل کرنے کا اصولی فیصلہ بھی کیا گیا، سپیشل ایجوکیشن مراکز کیلئے مزید 48 نئی بسوں کی فراہمی کی منظوری دی گئی۔

وزیراعلیٰ مریم نواز شریف نے آٹزم سکول کے بچوں، اساتذہ اور سٹاف کے لئے یونیفارم اور ڈیزائن کی بھی منظوری دی، 13 رکنی بورڈ آف گورنرز کی تشکیل اور آٹزم ریسورس سینٹر کے تین سالہ سٹریٹجک پلان کی منظوری دی گئی۔

معاون خصوصی ثانیہ عاشق  نے اجلاس میں بریفنگ دی جس میں بتایا گیا کہ مریم نواز آٹزم سکول میں ایک کسٹمائزڈ ماڈل نافذ کیا جا رہا ہے، نصاب تعلیم کا کسٹمائزڈ ماڈل دنیا کے مختلف ممالک میں کامیابی سے رائج ہے، ثبوت پر مبنی آٹزم ماڈلز اور بین الاقوامی ریسرچ سٹڈی کے بعد تیار کیا گیا ہے۔

بریفنگ کے مطابق سکول کے لئے ایک جامع فنکشنل گرین نصابِ تعلیم بھی تیار کیا گیا ہے، شنل گرین نصابِ تعلیم میں کمیونیکیشن و لینگویج، لائف سکلز، اسلامی و اخلاقی تعلیم، ٹیکنالوجی، جسمانی تعلیم اور سماجیات شامل ہیں۔

پاکستان کے پہلے آٹزم سکول میں اوپن جم، واکنگ ٹریک، سنسری گارڈن اور ساؤنڈ تھراپی سینٹرز قائم کئے جائیں گے، یہاں 3 سے 16 سال تک کے بچوں کو داخلہ دیا جائے گا اور مریم نواز آٹزم سکول اینڈ ریسرچ سینٹر میں بچے 22 سال کی عمر تک زیرِ تعلیم و زیرِ علاج رہ سکیں گے۔

آٹزم سکول کے لئے خصوصی ہائبرڈ ماڈل تیار کیا گیا ہے جس کے تحت بچوں کو اردو اور انگریزی دونوں زبانوں میں تصویری اور تحریری تھراپی دی جائے گی، بچوں کے والدین کے لئے بھی کوچنگ ماڈیولز تیار کر لئے گئے ہیں تاکہ گھر اور سکول کے درمیان بہتر ہم آہنگی قائم کی جا سکے۔

آٹزم سکول میں بچوں کی سکلز اور حفاظت کے لئے سی سی ٹی وی کیمرے نصب کئے جائیں گے، چلڈرن ویلفیئر آفیسرز سپیشل بچوں کی حفاظت اور فلاح کی براہِ راست نگرانی کریں گے، سکول میں ریسرچ اینڈ ٹیچر ٹریننگ ڈویژن بھی قائم ہو گا۔

اجلاس میں بتایا گیا کہ ریسرچ اینڈ ٹیچر ٹریننگ ڈویژن میں ماسٹر ٹرینرز اساتذہ کو جدید تربیت فراہم کریں گے، ریسرچ اینڈ ٹیچر ٹریننگ ڈویژن میں ایک سالہ ڈپلومہ اور سرٹیفکیٹ پروگرامز بھی شروع کئے جائیں گے۔

Follow Lahore News on Facebook

Install our App