(لاہور نیوز) لاہور میں قتل، اقدام قتل اور ڈکیتی مزاحمت کے دوران قتل کی وارداتیں بدستور جاری، رواں سال کے دوران شہر کے مختلف علاقوں میں مجموعی طور پر 246 افراد کو قتل کر دیا گیا۔
پولیس ریکارڈ کے مطابق ڈکیتی مزاحمت پر قتل کے 7 واقعات رپورٹ ہوئے تاہم دیگر مختلف علاقوں میں 246 افراد کو قتل کر دیا گیا جبکہ اقدام قتل کے 509 مقدمات درج کئے گئے۔
ڈکیتی مزاحمت پر قتل کی 4 وارداتوں کیساتھ صدر ڈویژن سرفہرست رہا، سٹی ڈویژن میں ڈکیتی مزاحمت پر 2 جبکہ کینٹ ڈویژن میں ڈکیتی مزاحمت پر ایک شہری کو ڈاکوؤں نے موت کے گھاٹ اتار دیا۔
پولیس ریکارڈ کے مطابق جہاں قتل کی وارداتوں میں ماڈل ٹاؤن ڈویژن 53 مقدمات کیساتھ سر فہرست رہی، صدر ڈویژن قتل کی 52 وارداتوں کے ساتھ دوسرے جبکہ کینٹ ڈویژن قتل کے 50 مقدمات کے ساتھ تیسرے نمبر پر رہا۔
سٹی ڈویژن 40، اقبال ٹاؤن ڈویژن میں مختلف وجوہات پر 27 افراد قتل ہوئے، سول لائنز ڈویژن میں قتل کے 24 مقدمات کا اندراج کیا گیا.
دوسری جانب اقدام قتل کی وارداتوں میں کینٹ ڈویژن 140 مقدمات کیساتھ سر فہرست رہا جبکہ سٹی ڈویژن 96 اور ماڈل ٹاؤن ڈویژن 94 مقدمات کیساتھ تیسرے نمبر پر رہا۔
اسی طرح صدر ڈویژن 90، اقبال ٹاؤن ڈویژن میں 56 اور سول لائنز ڈویژن میں اقدام قتل کے 33 مقدمات درج ہوئے۔
