(محمد اشفاق) سیالکوٹ میں قتل ہونے والے سری لنکن فیکٹری منیجر پریانتھا کمارا کے کیس سزائے موت اور عمر قید کی سزا پانے والے مجموعی طور پر 15 مجرموں کی سزاؤں کے خلاف اپیلوں کی سماعت کیلئے دو رکنی بینچ تشکیل دیدیا گیا۔

لاہور ہائیکورٹ کے جسٹس سید شہباز رضوی کی سربراہی میں قائم دو رکنی بینچ آج 9 ستمبر کو اپیلوں پر سماعت کرے گا، سری لنکا سے تعلق رکھنے والے فیکٹری مینجر پریانتھا کمارا کو توہین مذہب کا الزام لگا کر 3 دسمبر 2021 کو سیالکوٹ میں ہجوم کی جانب سے قتل کر دیا گیا تھا۔

ٹرائل کورٹ نے مجموعی طور پر 89 ملزماں کو مجرم قرار دیتے ہوئے سزائیں سنائیں جس میں سے 6 مجرمان محمد حمیر، تیمور احمد، محمد ارشاد، علی حسنین، ابو طلحہ اور عبدالرحمان کو دو دو دفعہ سزائے موت جبکہ دو دو لاکھ روپے معاوضہ مقتول پریانتھا کمارا کے ورثاء کو ادا کرنے کا حکم دیا گیا۔

9 مجرمان روحیل امجد، محمد شعیب، احتشام زیب، عمران ریاض، ساجد امین، ضیغم مہدی، علی حمزہ، لقمان حیدر اور عبدالصبور کو عمر قید کی سزا جبکہ دو دو لاکھ جرمانہ اور دو دو لاکھ روپے معاوضہ مقتول پریانتھا کے ورثاء کو ادا کرنے کا حکم دیا گیا، واضح رہے کہ  74 ملزمان کو 2، 2 سال قید بامشقت کی سزا سنائی گئی تھی جو اپنی سزا پوری کر کے جیل سے رہا ہو چکے ہیں،

عمر قید اور سزائے موت پانے والے مجرمان کی جانب سے سزاؤں کے خلاف اپیلیں دائر کی گئیں تو اب ان اپیلوں پر سماعت کے لیے سپیشل دو رکنی بینچ تشکیل دیدیا گیا، جسٹس سید شہباز رضوی اور جسٹس طارق محمود باجوہ پر مشتمل دو رکنی بینچ 9 ستمبر کو ان اپیلوں پر سماعت کرے گا، اس سلسلے میں پراسیکیوشن سمیت وکلا کو بذریعہ نوٹس مطلع کر دیا گیا ہے۔

Follow Lahore News on X

Install our App