مریم نواز کی متاثرہ خواتین سے ملاقات، مسائل دریافت کیے اور سیلاب متاثرین میں تحائف بھی تقسیم کیے، انہیں کیمپوں میں مقیم متاثرین کیلئے طبی سہولیات سے آگاہ کیا گیا۔

اس موقع پر ضلعی حکام  نے وزیر اعلی پنجاب کو بریفنگ دی، اپنی بریفنگ میں ان کا کہنا تھا کہ پانی کی نکاسی کیلئے اقدامات کیے جا رہے ہیں، مویشیوں کے لیے ڈاکٹرز اور چارے کا وافر ذخیرہ موجود ہے، متاثرہ علاقوں سےشہریوں کو محفوظ مقامات پر منتقل کیا گیا، گجرات میں 20 ریلیف کیمپ ہیں۔

وزیراعلیٰ پنجاب مریم نواز جلال پور جٹاں کے نواحی علاقے شہباز پور فلڈ ریلیف ٹینٹ سٹی پہنچ گئیں، انہوں نے نواز شریف کی ٹینٹ سٹی میں سیلاب متاثرہ خاندانوں سے ملاقات کی اور خواتین اور بچوں کو تحائف پیش کیے۔

مریم نواز نے ٹینٹ کے اندر بیٹھ کر ننھی بچی اور اس کی والدہ سے بات چیت کی، کمسن بچی نے وزیر اعلیٰ کو دیکھ کراظہار مسرت کیا، جبکہ وہاں کھانا، ادویات، صفائی اور دیگر سہولیات کے بارے میں بھی دریافت کیا۔

ذیابیطس کی شکار بزرگ خاتون کو شوگر چیک اپ کیلئے خود فیلڈ ہسپتال لیکر کر گئیں، اور انہیں انسولین، گلوکو میٹر اور دیگر ضروری اشیاء فراہم کرنے کی ہدایت کی۔

انہوں نے سیلاب سے گھر مسمار ہونے پر آبدیدہ نوجوان کو تسلی دی، گھر بنانے میں پوری معاونت کی یقین دہانی کرائی اور بھینس سیلاب میں بہہ جانے والے معمر شخص کو بھی دلاسہ دیا۔

اس موقع پر گفتگو کرتے ہوئے وزیراعلیٰ کا کہنا تھا کہ سروے شروع ہو رہا ہے، ازالہ کریں گے، آبی گزر گاہوں کے علاوہ دیگر مقامات پر گھر بھی بنا کر دیں گے، سیلاب متاثرین کو پینے کا صاف پانی، کھانا اور مویشیوں کو چارہ فراہم کیاجارہا ہے۔

مریم نواز نے کہا کہ لوگ جہاں جہاں بیٹھے ہیں وہاں ٹینٹ لگا کر دیے جائیں، کھانا اور دیگر ضروریات فراہم کی جائیں، تھرمل امیجنگ ٹیکنالوجی کے استعمال سے جانیں بچانے پر خوشی ہے، عوام کی خدمت کا جذبہ قابل تحسین ہے۔

انہوں نے سیلاب متاثرین کو تسلی دیتے ہوئے کہا کہ فکر نہیں کرنی میں آپ کے ساتھ ہوں، اس موقع پر وزیر اعلیٰ نے شہباز پور پل کا بھی دورہ کیا، ’ کلینک آن بوٹس‘ کا معائنہ کیا اور منصوبے کو سراہا۔

دوسری جانب مریم نواز  نے وائرلیس پر ریسکیو فیلڈ ٹیموں کو مبارکباد دی اور ان کی خدمات کو سراہا اور ریسکیو اہلکاروں کو انعام دینے کا اعلان بھی کیا۔