(لاہور نیوز) پی ڈی ایم اے پنجاب نے مون سون کے 10 ویں سپیل سے متعلق الرٹ جاری کر دیا۔

پنجاب ڈیزاسٹر مینجمنٹ اتھارٹی (پی ڈی ایم اے) نے مون سون بارشوں کے 10 ویں سپیل کے حوالے سے 6 سے 9 ستمبر تک کیلئے الرٹ جاری کر دیا ہے، ترجمان پی ڈی ایم اے کے مطابق صوبے کے بیشتر اضلاع میں شدید طوفانی بارشوں کا امکان ہے، جس کے پیشِ نظر شہریوں کو احتیاطی تدابیر اختیار کرنے کی اپیل کی گئی ہے۔

ترجمان پی ڈی ایم اے کے مطابق راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں بارشیں متوقع ہیں، اس کے علاوہ نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا اور میانوالی میں بھی بارشیں ہونے کا امکان ہے۔

ڈی جی پی ڈی ایم اے عرفان علی کاٹھیا  نے بتایا کہ جنوبی پنجاب کے علاقوں ڈیرہ غازی خان، ملتان اور راجن پور میں بھی بارشیں متوقع ہیں جبکہ 7 سے 9 ستمبر کے دوران ڈیرہ غازی خان کی رودکوہیوں میں فلیش فلڈنگ کا خدشہ موجود ہے۔

مزید برآں، دریائے چناب، راوی اور ستلج میں بھی سیلابی صورتحال درپیش ہے اور بڑے شہروں میں ندی نالوں کے بپھرنے کا خدشہ ظاہر کیا گیا ہے، پی ڈی ایم اے نے صوبہ بھر کے کمشنرز، ڈپٹی کمشنرز اور دیگر انتظامی افسران کو الرٹ رہنے کی ہدایات جاری کر دی ہیں۔

محکمہ صحت، آبپاشی، تعمیر و مواصلات، لوکل گورنمنٹ اور لائیوسٹاک کو بھی الرٹ کر دیا گیا ہے تاکہ کسی بھی ہنگامی صورتحال سے بروقت نمٹا جا سکے۔

ڈی جی عرفان علی کاٹھیا  نے عوام سے اپیل کی ہے کہ وہ خراب موسم میں احتیاطی تدابیر اختیار کریں، دریاؤں اور ندی نالوں کے قریب جانے سے گریز کریں، آندھی و طوفان کی صورت میں محفوظ مقامات پر قیام کریں اور غیر ضروری سفر سے بچیں۔

ایمرجنسی کی صورت میں شہری پی ڈی ایم اے ہیلپ لائن 1129 پر فوری رابطہ کر سکتے ہیں۔

Subscribe Lahore News on YouTube

Install our App