(لاہور نیوز) ملک بھر میں سیلابی صورتحال کو مدنظر رکھتے ہوئے پنجاب پبلک سروس کمیشن کی جانب سے امتحانات ملتوی کر دیئے گئے۔
ترجمان ڈپٹی ڈائریکٹر سید کاظم مقدس کاظمی نے کہا کہ امتحانات ملتوی کرنے کا فیصلہ چیئرمین پی پی ایس سی لفٹیننٹ جنرل ریٹائرڈ محمد عبدالعزیز کی زیر صدارت اجلاس میں ہوا۔
انہوں نے کہا کہ اجلاس میں سیکرٹری پی پی ایس سی افضال احمد، ممبر ایگزام مرزا سہیل عامر اور انچارج ایگزامینیشن رانا راحت شریک ہوئے۔
سید کاظم مقدس کاظمی نے کہا کہ امتحانات کی نئی تاریخوں کا اعلان بعد میں کیا جائے گا، امیدواروں کو نئی تاریخوں سے متعلق ایس ایم ایس، ای میل اور ویب سائٹ کے ذریعے آگاہ کیا جائے گا۔
ترجمان نے کہا کہ پنجاب بھر کے مختلف علاقوں سے امیدواروں نے امتحانات میں شرکت کرنا تھی، سیلابی صورتحال کے باعث امیدواروں کی مشکلات کو مدنظر رکھتے ہوئے یہ فیصلہ کیا گیا ہے۔
انہوں نے مزید کہا کہ امتحانات 30 اور 31 اگست کو ہونا تھے، 434 آسامیوں کے لیے 8 ہزار سے زائد امیدواروں نے شرکت کرنا تھی، ملتوی ہونے والے امتحانات میں انسپکٹر لیگل (سپیشلسٹ کیڈر) پنجاب پولیس اور دیگر آسامیاں شامل ہیں۔
