(ویب ڈیسک) عمان نے کلچر اینڈ سائنٹیفک کو آپریشن پروگرام کے تحت پاکستانی طلبہ کیلئے مکمل طور پر فنڈڈ سکالر شپ کا اعلان کر دیا۔

 رپورٹ کے مطابق 23 سال کی عمر تک کے ایف اے پاس طلبہ درخواستیں دینے کے اہل ہوں گے۔

عمان حکومت نے پاکستان سمیت دنیا بھر کے طلبہ کیلئے مکمل طور پر فنڈڈ سکالر شپ کا اعلان کر دیا جو منتخب مضامین میں بیچلر کی ڈگری حاصل کرنے کا سنہری موقع ہے، درخواستیں کلچر اینڈ سائنٹیفک کوآپریشن پروگرام کے تحت طلب کی گئی ہیں۔

رپورٹ کے مطابق سکالر شپ کے تحت طلبہ عمان بھر کے سرفہرست ہائر ایجوکیشن انسٹی ٹیوٹس میں انجینئرنگ، ہیومنیٹیز، انفارمیشن ٹیکنالوجی اور سائنس بشمول میڈیسن کی ڈگری کیلئے تعلیم حاصل کرسکیں گے۔

سکالر شپ حاصل کرنیوالے طلبہ کو ،ٹیوشن فیس کی مکمل چھوٹ ہو گی، ماہانہ وظیفہ 200 عمانی ریال (اگر رہائش فراہم نہیں کی گئی)، 140 عمانی ریال (مفت رہائش کے ساتھ)ہوگا۔ہر تعلیمی سال میں طلبہ اپنے ملک ایک راؤنڈ ٹرپ لگا سکیں گے، ہوائی ٹکٹ بھی دیا جائے گا۔

اہلیت کے معیار کے مطابق درخواست دہندگان کا پاکستانی شہری ہونا ضروری ہے، جس کی عمر 23 سال یا اس سے کم ہو، طالبعلم نے انٹرمیڈیٹ یا اس کے مساوی اہلیت (گریڈ 12) گزشتہ تین سالوں میں مکمل کی ہو اور طبی لحاظ سے فٹ ہو، عمان کی وزارت تعلیم سے مساوی تعلیم کا سرٹیفکیٹ بھی لازمی ہے۔

طالب کیلئے مطلوبہ دستاویزات میں ایک قابل قبول پاسپورٹ، تعلیمی سرٹیفکیٹ، عمانی مساوات کا سرٹیفکیٹ اور انگریزی زبان کی مہارت کے نتائج (اگر دستیاب ہوں) شامل ہیں۔

رپورٹ کے مطابق درخواست گزار کی تمام گزارشات انگریزی میں ہونی چاہئیں، فائل کے سائز کیلئے مخصوص حد بھی مقرر کی گئی ہے، جس کے مطابق پی ڈی ایف 2 ایم بی اور تصاویر کیلئے ایک ایم بی تک ہونی چاہئیں اور فائل ناموں میں خصوصی حروف (سپیشل کیریکٹر) سے گریز کرنا ضروری قرار دیا گیا ہے۔

Follow Lahore News on Facebook

Install our App