چہلم امام حسینؓ: فول پروف سکیورٹی کیلئے لاہور سمیت ملک بھر میں پاک فوج و سول آرمڈ فورسز تعینات
(لاہور نیوز) چہلم امام حسینؓ کے موقع پر لاہور سمیت ملک بھر میں فول پروف سکیورٹی انتظامات کیلئے وفاقی حکومت کی جانب سے پاک فوج اور سول آرمڈ فورسز کو تعینات کر دیا گیا ہے۔
وفاقی کابینہ کی منظوری کے بعد چہلم کے موقع پر سیکیورٹی کے فرائض انجام دینے کیلئے پاک فوج اور سول آرمڈ فورسز کی تعیناتی کے احکام جاری کر دیے گئے ہیں۔
اس سلسلے میں پاک فوج کی تعیناتی آئین کے آرٹیکل 245 اور سول آرمڈ فورسز کی تعیناتی انسداد دہشتگردی ایکٹ 1997 کے تحت کی گئی ہے، پاک فوج اور سول آرمڈ فورسز کی تعیناتی چہلم میں سکیورٹی ڈیوٹیز کیلئے ہو گی۔
فوج اور سول آرمڈ فورسز چہلم کے موقع پر صوبائی حکومتوں اور ضلعی انتظامیہ کے ساتھ سکیورٹی کے فرائض سر انجام دیں گی۔
واضح رہے کہ وفاقی حکومت کو چاروں صوبوں، آزاد کشمیر اور گلگت بلتستان کی حکومتوں نے سیکیورٹی کیلئے درخواست دی تھی، اس کے علاوہ اسلام آباد ضلعی انتظامیہ نے بھی چہلم کی سکیورٹی کیلئے درخواست دے رکھی ہے۔
