(لاہور نیوز) گورنر پنجاب سردار سلیم حیدر خان نے کہا ہے کہ چولستان کا کوئلہ صرف ایک صنعتی منصوبہ نہیں بلکہ پنجاب کی معاشی ترقی کا انقلابی موقع ہے۔

گورنر پنجاب سے پاکستان کول ایسوسی ایشن کے وفد نے ملاقات کی اور پنجاب میں کول انڈسٹری کو درپیش مسائل سے آگاہ کیا۔

سردار سلیم حیدر نے وفد سے گفتگو کرتے ہوئے کہا کہ پیپلز پارٹی نے تھر میں کوئلہ سے توانائی حاصل کرکے معیشت میں انقلاب برپا کیا، پاکستان کو توانائی بحران سے نکالنے کا واحد حل تھرپارکر کا کوئلہ ہے، گورنر شہید بی بی نے تھرکول پر کام شروع کیا، انکی حکومت ختم ہوتے ہی کام بند کر دیا گیا، 2008ء میں صدر زرداری نے شہید بی بی کے وژن کے تحت تھرکول پر کام کروایا۔

 گورنر پنجاب نے کہا کہ پاکستان پیپلز پارٹی کی سندھ حکومت کی جانب سے شروع کئے گئے تھر کول بلاک 2 کے منصوبے سے اب تک 17000 سے زائد مقامی لوگوں کو روز گار مل چکا ہے، پاکستان کوئلہ ایسوسی ایشن ملک بھر کی صنعتوں کو کوئلے کی بلا تعطل فراہمی کے لیے قابل تعریف کردار ادا کر رہی ہے۔

انہوں نے کہا کہ "ریت سے توانائی – چولستان، نیا تھر" کے مطابق اگر ان ذخائر کو بروئے کار لایا جائے تو اربوں روپے کی سرمایہ کاری ممکن ہے، چولستان کی ترقی نا صرف توانائی بلکہ معاشی و سماجی خوشحالی کا ذریعہ بن سکتی ہے، چولستان کی ترقی سے یہ خطہ ایک صنعتی مرکز کے طور پر ابھر سکتا ہے، صحرا کی سیاحت کو جدید صنعتی ترقی کے ساتھ جوڑ کر نئی راہیں کھولی جا سکتی ہیں۔

وفد کا اس موقع پر کہنا تھا کہ کوئلہ کی گاڑیوں کو پنجاب میں غیر ضروری چیکنگ اور ہراسانی کا سامنا کرنا پڑتا ہے جس سے سپلائی متاثر ہوتی ہے اس کا مستقل سدباب ہونا چاہیے۔

گورنر پنجاب نے وفد کو یقین دہانی کروائی کہ پاکستان کوئلہ ایسوسی ایشن کے مسائل کے فوری حل کے لیے گورنر ہاؤس اپنا بھرپور کردار ادا کرے گا۔

Follow Lahore News on Facebook

Install our App