(لاہور نیوز) وزیراعلیٰ پنجاب مریم نواز شریف نے کہا ہے کہ ہیپاٹائٹس کی ویکسین کی فراہمی کو یقینی بنایا جا رہا ہے۔
وزیراعلیٰ پنجاب مریم نواز شریف نے ورلڈ ہیپاٹائٹس ڈے کے موقع پر اپنے خصوصی پیغام میں کہا ہے کہ ہیپاٹائٹس ایک خاموش قاتل ہے جو آہستہ آہستہ جگر کو متاثر کرتا ہے اور اگر بروقت تشخیص اور علاج نہ کیا جائے تو یہ جان لیوا ثابت ہو سکتا ہے۔
وزیراعلیٰ نے کہا کہ پنجاب حکومت ہیپاٹائٹس کے خاتمے کیلئے بھرپور اقدامات کر رہی ہے، ہیپاٹائٹس کی ویکسین کی فراہمی کو یقینی بنایا جا رہا ہے، جبکہ فیلڈ ہسپتالوں اور کلینک آن ویلز پر ہیپاٹائٹس ٹیسٹ کی مفت سہولیات فراہم کی جا رہی ہیں۔
انہوں نے مزید کہا کہ ہیپاٹائٹس کے مریضوں کو مفت ادویات ان کے گھروں تک پہنچائی جا رہی ہیں تاکہ کسی بھی رکاوٹ کے بغیر علاج کا سلسلہ جاری رکھا جا سکے۔
مریم نواز شریف نے اس موقع پر عوام سے اپیل کی کہ وہ لازمی طور پر اپنا ہیپاٹائٹس کا ٹیسٹ کروائیں، ویکسین لگوائیں اور اس پیغام کو دوسروں تک پہنچائیں، ہیپاٹائٹس سے بچاؤ صرف احتیاط اور بروقت علاج سے ہی ممکن ہے۔
انہوں نے کہا کہ ہیپاٹائٹس سے متعلق آگاہی مہم کے ذریعے عوام میں شعور بیدار کیا جا رہا ہے کیونکہ صحت مند پنجاب ہی ترقی یافتہ پنجاب کی ضمانت ہے۔
