لاہور (محمد اشفاق) منی لانڈرنگ کیس میں ایف آئی اے کی جانب سے چالان جمع نہ ہو سکا جبکہ پرویز الٰہی کی حاضری معافی منظور ہو گئی۔

ایف آئی اے سینٹرل لاہور کے جج نے منی لانڈرنگ سے متعلق مقدمے کی سماعت کی، دوران سماعت پرویز الٰہی کے وکیل عامر سعید راں  نے پرویز الٰہی کی حاضری معافی سے متعلق درخواست دی اور بتایا طبیعت ناساز ہونے کے باعث پرویز الٰہی پیش نہیں ہو سکے۔

عدالت نے پرویز الٰہی کی حاضری معافی کی درخواست منظور کر لی اور ایف آئی اے سے استفسار کیا کہ مقدمہ کا چالان کہاں ہے ؟ تفتیشی افسر  نے کہا کہ چالان جمع کروانے کیلئے مہلت دی جائے۔

پرویز الٰہی کے وکیل عامر سعید راں  نے کہا کہ تین مرتبہ ایف آئی اے  نے مہلت مانگی لیکن پرویز الٰہی کے خلاف الزامات ثابت نہیں کر سکے، ایف آئی اے کے پاس کوئی ثبوت نہیں صرف انتقامی کارروائی کا نشانہ بنایا جا رہا ہے، جس پر عدالت نے کہا کہ ایف آئی اے کی جانب سے مہلت مانگی جاتی ہے، الزامات لگائے ہیں تو چالان جمع کروائیں۔

 وکیل عامر سعید راں  نے کہا کہ مونس الٰہی بے قصور ہیں، جان بوجھ کر مقدمے میں نامزد کیا گیا، مونس الٰہی کے خلاف ایک الزام ثابت نہیں ہوا، مونس الٰہی کے ریڈ وارنٹ نکال کر قانون کی دھجیاں بکھیری جا رہی ہیں، حکومت کے پاس ایسے پرویز الٰہی اور مونس الہی کے خلاف منی لانڈرنگ کے کوئی شواہد نہیں ہیں، صرف سیاسی انتقامی کارروائی کا نشانہ بنانے کیلئے مقدمہ قائم کیا گیا، اگر کوئی ثبوت ہوتے تو حکومت عدالت میں پیش کرتی لیکن ایسا نہیں ہوا۔

عدالت نے ایف آئی اے کو مقدمہ چالان جمع کروانے کیلئے 18 اگست تک آخری موقع دیدیا اور کہا کہ چالان نہ آیا تو قانون کے مطابق کارروائی آگے بڑھے گی۔

Follow Lahore News on X

Install our App