(لاہور نیوز) پنجاب حکومت اور ایشیائی ترقیاتی بینک (اے ڈی بی) کا زراعت میں جدید مشینری کے استعال، عوام کے لیے جدید ٹرانسپورٹ کے نظام کے آغاز اور ماحولیاتی تحفظ کی آبزرویٹری کے قیام کے لیے مالیاتی تعاون پر اتفاق ہوا ہے۔

سینئرصوبائی وزیر مریم اورنگزیب سے اے ڈی بی کے وفد نے ملاقات کی۔ ملاقات میں پاکستان کے لیے 'نیو کنٹری پارٹنرشپ اسٹریٹجی' پر تفصیلی بات چیت کی گئی۔ ملاقات میں پاکستان کے سٹریٹجک گروتھ چیلنجز پر تبادلہ خیال کیا گیا۔ ملاقات میں ترقی کے شفاف عمل کے فروغ، برآمدات اور سرمایہ کاری میں اضافہ، جدید تجارتی نظام کے قیام اورعوامی سرمائے کے درست استعمال کے پہلوؤں پرغورکیا گیا۔

مریم اورنگزیب نے ملاقات کے دوران گفتگو کرتے ہوئے کہا کہ وزیراعلیٰ مریم نواز شریف نے پنجاب کی ترقی اورعوام کی بہبود کا ایک تاریخی اور بڑا بجٹ دیا ہے، بجٹ میں صحت،تعلیم، ہنرسکھانے اور عوام کی زندگی میں بہتری لانے کے ریکارڈ منصوبے رکھے گئے ہیں، سرگودھا میں امراضِ قلب اور لاہور میں نواز شریف کینسر ہسپتال قائم کررہے ہیں۔

سینئر وزیر مریم اورنگزیب نے کہا کہ صحت عامہ کی خدمات کی 911 نئی سکیمیں، کلینک آن وہیلز، ماں بچے کی صحت اور نئی اوپی ڈیز کی فراہمی بجٹ میں شامل ہے، زراعت، صنعت، ماہی گیری، ڈیمز، آئی ٹی کے شعبوں میں جدت، ٹیکنالوجی کا جامع عمل جاری ہے۔

انہوں نے مزید کہا کہ پہلی بارعوام کی ضروریات کے درست اعدادوشمار کی فراہمی کے لئے سوشل اکنامک رجسٹری بن رہی ہے، پہلی بارماحولیاتی تحفظ کے لیے ریکارڈ کام ہوا، ہر شعبے کو ماحول دوست بنایا جا رہا ہے، الیکٹرک بسوں کے آغاز سے آلودگی کا ہر ذریعہ ختم کیا جا رہا ہے۔

 اے ڈی بی وفد نے وزیراعلیٰ پنجاب مریم نواز شریف کے ان اقدامات کی تحسین کی۔

Subscribe Lahore News on YouTube

Install our App