(لاہور نیوز) وزیر اعلی پنجاب مریم نواز شریف نے ایکسپو سینٹر میں صنعتی مزدوروں کے لیے مریم نواز راشن کارڈ پروگرام کی لانچنگ تقریب سے خطاب کرتے ہوئے کہا کہ ایٹمی صلاحیت کی وجہ سے آج ملکی دفاع ناقابل تسخیر ہے، پاک افواج ہر خطرے سے نمٹنے کیلئے تیار ہیں۔

وزیر اعلیٰ پنجاب مریم نواز  نے 40 ارب روپے کی لاگت سے بنائے گئے راشن کارڈ پروگرام کا آغاز کرتے ہوئے کہا کہ اللہ کا شکر ہے آج میرا دیرینہ خواب پورا ہو رہا ہے، ملکی ترقی میں سب سے بڑا ہاتھ محنت کرنے والوں کا ہے، ساڑھے 12 لاکھ محنت کش خاندانوں کو یکم جون سے راشن کارڈ دیں گے۔

انہوں نے کہا کہ راشن کارڈ سے محنت کشوں کو ماہانہ تین ہزار روپے ملیں گے، 40 ہزار کان کنوں کو بھی راشن کارڈ ملیں گے، راشن کارڈ پروگرام سالانہ 50 ارب روپے سے شروع کر رہے ہیں۔

مریم نواز  نے کہا کہ محنت کش زندگی بھر محنت کرتے ہیں لیکن گھر نہیں بنا پاتے، راشن کارڈ ان لوگوں کے لیے ہے جو دن میں 12 سے 16 گھنٹے کام کرتے ہیں، مزدور کی کم سے کم اجرت 37 ہزار روپے پر عملدرآمد یقینی بنایا جا رہا ہے۔

وزیر اعلیٰ نے کہا کہ محنت کشوں کو ان کی دہلیز پر سہولت یقینی بنائیں گے، پنجاب میں ایک لاکھ لیپ ٹاپ پروگرام کل سے شروع کرنے جارہے ہیں، پنجاب کے عوام کے لیے اے آر ٹی بس  لے کر آرہی ہیں جس میں 300 مسافروں کی گنجائش ہے، بہت جلد 2 ہزار بسیں  لے کر آرہے ہیں، انہوں نے کہا کہ شہباز شریف نے بجلی کی قیمت کم کی ہے اس بار بل بھی کم آئیں گے۔

مریم نواز شریف کا کہنا تھا کہ شور ہو رہا ہے کہ کسانوں کو نقصان ہو گیا ہے، میں نے کہا تھا کسانوں کو نقصان نہیں ہونے دوں گی، جھوٹ پھیلایا جارہا ہے کہ کسانوں کو نقصان ہو گیا انہیں ہم فی ایکڑ 5000 روپے کی سبسڈی دینے جا رہے ہیں، میں چاہتی ہوں 15 کروڑ عوام کو سستا آٹا اور ستی روٹی بھی ملے، میری کوشش ہے کسانوں کو نقصان نہ ہو اور روٹی بھی مہنگی نہ ہو، تب تک چین سے نہیں بیٹھوں گی جب تک سب کے گھر میں خوشحالی نہ آئے۔

Follow Lahore News on X

Install our App