سکھر میں جلسے سے خطاب کرتے ہوئے بلاول بھٹو کا کہنا تھا کہ یہ بات ہو چکی ہے کہ یہ حکومت پاکستان کی پالیسی ہے کہ آپ کی مرضی کے بغیر کوئی نئی کینالز نہیں بنیں گی۔

انہوں  نے کہا کہ یہ پُرامن جمہوری جدوجہد کی کامیابی ہے، وفاقی حکومت نے فیصلہ کیا کہ مشترکہ مفادات کونسل میں باہمی رضامندی کے بغیر دریائے سندھ سے کوئی نہر نہیں بنے گی۔

چیئرمین پیپلزپارٹی کا کہنا تھا کہ آپ سب کو مبارکباد پیش کرتا ہوں، پیپلزپارٹی اور ن لیگ کے درمیان ایک معاہدہ ہوا ہے، معاہدے پر دونوں جماعتوں کے دستخط موجود ہیں یہ ممکن نہیں ہوتا اگر پیپلزپارٹی کے جیالے میدان میں نہ ہوتے۔

بلاول بھٹوزرداری نے کہا کہ 2 مئی کو اجلاس ہے اس مسئلہ کو ہم ختم کریں گے، یکم مئی کو میرپور خاص میں جلسہ کریں گے، وعدہ کیا تھا ہم  سندھ کو بچائیں گے، سندھ کو خطرات سے بچایا ہے یہ آپ کی کامیابی ہے۔

دوسری جانب بلاول بھٹو  نے کہا کہ بھارت کی طرف سے سندھ پر حملہ ہوا ہے، مقبوضہ کشمیر میں دہشتگردی کا واقعہ ہوا، مقبوضہ کشمیر میں دہشتگردی کے واقعہ کی ہم  نے مذمت کی، مودی نے پاکستان پر جھوٹے الزامات لگائے ہیں، بھارت نے سندھ طاس معاہدہ ختم کر کے یکطرفہ فیصلہ کیا۔

چیئرمین پیپلزپارٹی نے کہا کہ دریائے سندھ ہمارا ہے اور اس میں ہمارا پانی بہے گا یا ان کا خون، پاکستان کے عوام بہادر لوگ ہیں ڈٹ کر مقابلہ کریں گے، دنیا کوپیغام دیں گے سندھ پر ڈاکہ نامنظور، ہم اس دریا کے وارث اور محافظ ہیں۔

بلاول بھٹو زرداری کا کہنا تھا کہ چار صوبے چار بھائی ہیں مودی کو منہ توڑ جواب دیں گے، ہماری جدوجہد جاری رہےگی جب تک بھارت فیصلہ واپس نہیں لیتا، ہم وزیر اعظم شہبازشریف کے شانہ بشانہ کھڑےہیں، مشکل وقت میں وفاق کی آواز بنیں گے، پورے پاکستان کو ایک ہو کر ان کا مقابلہ کرنا پڑے گا، مودی کی کوششیں ناکام ہوں گی۔