(لاہور نیوز) چاند رات اور عید الفطر کیلئے پنجاب پولیس نے سکیورٹی پلان فائنل کر لیا، آئی جی پنجاب ڈاکٹر عثمان انور کا کہنا ہے کہ چاند رات اور عیدالفطر پر لاہور سمیت صوبہ بھر میں سکیورٹی ہائی الرٹ رہے گی اور اضافی نفری تعینات ہو گی۔

ترجمان پنجاب پولیس نے بتایا کہ چاند رات پر لاہور سمیت صوبہ بھر میں مارکیٹوں اور اہم مقامات پر لیڈیز پولیس سکواڈ سمیت 21 ہزار سے زائد افسران و اہلکار تعینات ہونگے، چاند رات پر صوبائی دارالحکومت میں 4 ہزار افسران و اہلکار سکیورٹی کے فرائض انجام دیں گے۔

 ترجمان پنجاب پولیس کا مزید کہنا ہے کہ عید الفطر پر لاہور سمیت صوبہ بھر میں 29 ہزار سے زائد عید اجتماعات کیلئے47 ہزار سے زائد افسران و اہلکار تعینات ہونگے، صوبائی دارالحکومت میں 9 ہزار افسران و اہلکار سکیورٹی کے فرائض انجام دیں گے۔

آئی جی پنجاب ڈاکٹر عثمان انور نے ہدایات جاری کرتے ہوئے کہا ہے کہ سپیشل برانچ، سی ٹی ڈی، سکیورٹی ایجنسیز کی مدد سے دہشت گردوں، شر پسند عناصر پر کڑی نظر رکھیں، ملکی سکیورٹی حالات کے پیش نظر بین الصوبائی سرحدی و دریائی پولیس چیک پوسٹوں پر تعینات اہلکار انتہائی الرٹ رہیں، سی سی ٹی وی کیمروں سے مساجد، امام بارگاہوں، مارکیٹوں، اہم مقامات کی مسلسل مانیٹرنگ کی جائے، ڈولفن سکواڈ، پی آر یو، ایلیٹ ٹیمیں مساجد، مارکیٹوں اور اہم مقامات کے گرد موثر پٹرولنگ کریں۔

 آئی جی پنجاب نے مزید کہا ہے کہ ون ویلنگ، ہوائی فائرنگ، ہلڑ بازی، پتنگ بازی کی ہرگز اجازت نہیں،خواتین، فیملیز کو ہراساں کرنے والے اوباشوں کے خلاف سخت کارروائی عمل میں لائی جائے گی، آر پی اوز، ڈی پی اوز چاند رات اور عید سکیورٹی انتظامات کی خود نگرانی کریں، اہم شاہراہوں، تفریحی و پبلک مقامات پر ٹریفک کی روانی برقرار رکھنے کے لیے اضافی نفری تعینات کی جائے۔

Follow Lahore News on Facebook

Install our App