(لاہور نیوز) وزیر اطلاعات پنجاب عظمیٰ بخاری نے کہا تمام صوبوں کے عوام وزیراعلیٰ مریم نواز کی کارکردگی کی گواہی دے رہے ہیں۔

ڈی جی پی آر میں وزیراطلاعات پنجاب عظمیٰ بخاری کا پریس کانفرنس کرتے ہوئے کہنا تھا کہ سروے رپورٹ میں 70 فیصد لوگ وزیراعلیٰ مریم نواز کی کارکردگی سے متاثر ہیں، وزیراعلیٰ مریم نواز کسانوں کو سہولیات دے رہی ہیں، اس وقت 54 ارب روپے کے قرضے چھوٹے کسانوں کو دیئے جا چکے ہیں، وزیراعلیٰ کے کسان کارڈ پر اب تک 54 ارب روپے کی خریداری ہو گئی ہے، اب تک 10 ہزار گرین ٹریکٹرز دے چکی ہیں، وزیراعلیٰ مریم نواز اب تک 30 ہزار بچوں کو سکالر شپس دے چکی ہیں۔

وزیر اطلاعات پنجاب عظمیٰ بخاری نے کہا وزیراعلیٰ مریم نواز تمام بڑی بیماریوں کی ادویات مریضوں کے گھروں تک پہنچاتی ہیں، ڈائیلسز پروگرام کے تحت 10 لاکھ تک کا کارڈ لوگوں کو مل رہا ہے، وزیراعلیٰ مریم نواز 10ماہ میں ایئرایمبولینس سروس لائیں، وزیراعلیٰ لائیوسٹاک کارڈ کی سہولت لائیں، جو مویشی یہاں پالے جائیں گے ان کو باہر بھیج کر زرمبادلہ کمایا جائے گا، وزیراعلیٰ مریم نواز نے اپنی چھت اپنا گھر پروگرام جیسا فلیگ شپ منصوبہ شروع کیا، اس منصوبے میں ہزاروں گھر بن چکے ہیں۔

 عظمیٰ بخاری نے کہا آج وزیراعلیٰ مریم نواز کے سارے منصوبوں سے بزدار کو جوڑا جا رہا ہے، عثمان بزدار اتنے قابل ہوتے تو اپنا تعارف خود ہی کرا لیتے، روڈا کا منصوبہ پی ٹی آئی حکومت نے تباہ وبرباد کیا، روڈا منصوبے پر تمام صحافیوں کو ٹرک کی بتی کے پیچھے لگایا گیا، کہا گیا روڈا میں صحافی اپنے پلاٹ کے پیسے خود دیں گے، پی ٹی آئی دور میں کینسر کے مریضوں تک ادویات بند کر دی تھیں، انہوں نے یہ بھی جھوٹ بولا کہ ایئرایمبولینس لانی ہے، یہ کہتے تھے الیکٹرک بسیں لائیں گے۔

عظمیٰ بخاری نے کہا کچھ سیاسی بونوں اور سیاسی یتیموں کو سمجھ نہیں آتی، پنجاب اسمبلی کے اپوزیشن لیڈر کو نمبر بنانے کیلئے کچھ نہ کچھ کرنا پڑتا ہے، یہ اپنے لوگوں کا خود سامنا نہیں کر سکتے، موصوف نے جھوٹ پر سارا وائٹ پیپر چھاپ دیا، اپوزیشن لیڈر کو مفید مشورہ ہے جس نے آپ کو یہ چیزیں بھیجیں اس کو بلاک کر دیں۔

Subscribe Lahore News on YouTube

Install our App