(لاہور نیوز) یونیورسٹی آف سنٹرل پنجاب بھی جشن آزادی کی خوشیوں میں پیش پیش ہے۔ یو سی پی میں جشن آزادی کی تقریب ہوئی۔

یو سی پی میں 76 ویں یوم آزادی کی مناسبت سے رنگارنگ تقریب ہوئی۔ تقریب کا اہتمام ڈیپارٹمنٹ آف سٹوڈنٹس افیئرز کی جانب سے کیا گیا۔ طلبہ نے سبز اور سفید ملبوسات زیب تن کرکے آزادی کا جشن منایا۔ پرو ریکٹر ہادیہ اعوان نے تقریب کی صدارت کی اور بلڈنگ اے میں پرچم کشائی کی۔ بینڈ کی جانب سے سلامی بھی پیش کی گئی۔

طلبہ اور فیکلٹی ممبران نے فیملیز اور ننھے بچوں کے ساتھ آزادی کا جشن منایا۔ فزکس کے ہیڈ آف ڈیپارٹمنٹ ڈاکٹر کرار حیدر نے طلبہ کو یوم آزادی کی اہمیت سے آگاہ کیا۔ طلبہ کو ڈاکیومنٹری کے ذریعے غلامی سے آزادی کے سفر میں آباؤ اجداد کی قربانیاں دکھائی گئیں۔ قائداعظم کی جدوجہد اور نوجوان مسلمانوں سے خطاب بھی سنائے گئے۔

یو سی پی میوزیکل سوسائٹی کے طلبہ نے ملی نغمے بھی پیش کئے۔ طلبہ نے مفکر پاکستان علامہ اقبالؒ کے اشعار کے ذریعے لہو بھی گرمایا۔

طلبہ کی جانب سے پاکستان کے کلچر کے رنگ بھی نمایاں کئے گئے۔ پنجابی، سرائیکی، سندھی اور پشتو ڈانس کرکے خوب رنگ بکھیرے۔

پرو ریکٹر ہادیہ اعوان کا کہنا تھا کہ آزادی جنگوں سے نہیں، دل اور علم سے حاصل ہوتی ہے۔ ہمارے پاس صرف ایک راستہ ہے کہ علم حاصل کریں۔

طلبہ کا کہنا تھا کہ یونیورسٹی آف سنٹرل پنجاب نے ملک سے محبت کے اظہار کا شاندار موقع دیا۔ دوسری یونیورسٹی کے طلبہ بھی یو سی پی کی تعریف کئے بغیر نہ رہ سکے۔

تقریب کے اختتام پر پرو ریکٹر ہادیہ اعوان نے فیکلٹی ممبران اور ننھے بچوں کے ساتھ مل کر جشن آزادی کا کیک کاٹا۔

Follow Lahore News on Facebook

Install our App