(لاہور نیوز) پنجاب فوڈ اتھارٹی نے صحت دشمن عناصر کے خلاف بھرپور آپریشن کرتے ہوئے ہزاروں کلو ناقص اور ایکسپائر خوراک تلف کر دی۔

ڈی جی پنجاب فوڈ اتھارٹی کی ہدایت پر فوڈ سیفٹی ٹیموں  نے کاہنہ نو اور سندر روڈ کے علاقوں میں کارروائیاں کیں، جہاں مختلف فوڈ یونٹس اور کولڈ سٹورز کی چیکنگ کی گئی۔

حکام کے مطابق 5 ہزار کلو گوشت کی چیکنگ کی گئی، جس میں سے 1400 کلو ایکسپائر فروزن گوشت برآمد کر کے موقع پر تلف کر دیا گیا، کولڈ سٹور میں ایکسپائر پروڈکٹس پر لازم لیبل موجود نہیں تھے جبکہ فریش اور ایکسپائر گوشت کو قوانین کے برعکس اکٹھا سٹور کیا گیا تھا۔

کارروائی کے دوران 900 کلو دال چنا، 80 کلو بیسن، 100 کلو مکئی، چکی اور وزن کانٹا ضبط کیا گیا، بیسن میں مکئی کے آٹے کی ملاوٹ ثابت ہونے پر یونٹ کی پروڈکشن بند کر دی گئی جبکہ سیمپلز  لے کر مزید جانچ کیلئے لیبارٹری بھجوا دیئے گئے۔

ڈی جی فوڈ اتھارٹی کا کہنا ہے کہ صفائی کے ناقص انتظامات، ملازمین کے میڈیکل سرٹیفکیٹس اور ضروری ریکارڈ بھی موجود نہیں تھا، جو قوانین کی سنگین خلاف ورزی ہے۔

ڈی جی فوڈ اتھارٹی نے واضح کیا کہ وزیر اعلیٰ پنجاب کے ویژن کے تحت ملاوٹ سے پاک اور صحت مند پنجاب کے قیام کیلئے بلاامتیاز کارروائیاں جاری رہیں گی، غذائی دہشتگردوں کیلئے قانون مزید سخت کیا جا رہا ہے اور خلاف ورزی پر مقدمہ درج کر کے کاروبار بند کر دیا جائے گا۔

انہوں  نے خوراک کا کاروبار کرنے والوں کو ہدایت کی کہ وہ پنجاب فوڈ اتھارٹی کے مقرر کردہ قوانین پر سختی سے عمل درآمد یقینی بنائیں، خصوصاً ماہِ مبارک میں ناجائز منافع کیلئے عوام کی صحت سے کھیلنے والوں کو کسی قسم کی رعایت نہیں دی جائے گی۔

Subscribe Lahore News on YouTube

Install our App