(ویب ڈیسک) معروف یوٹیوبر رجب بٹ اور ان کی اہلیہ ایمان کے درمیان طلاق سے متعلق سوشل میڈیا پر گردش کرنے والی خبروں پر اہلِ خانہ نے وضاحت جاری کر دی۔
رجب بٹ کی ساس لبنیٰ جبین نے طلاق کی افواہوں کو بے بنیاد قرار دیتے ہوئے واضح کیا ہے کہ میاں بیوی کا رشتہ بدستور قائم ہے، انسٹاگرام سٹوری میں انہوں نے کہا کہ اگر کسی قسم کے مسائل موجود ہیں تو انہیں باہمی مشاورت سے حل کیا جا رہا ہے اور ایمان رجب نے اپنی شادی کو برقرار رکھنے کا واضح ارادہ ظاہر کیا ہے۔
انہوں نے دعا کی کہ اللہ تعالیٰ جوڑے کو سکون، سمجھ بوجھ اور ہم آہنگی عطا فرمائے، خاص طور پر ان کے بیٹے کیوان سلطان کے بہتر مستقبل کے لئے۔
انہوں نے سوشل میڈیا پر ذاتی زندگی میں مداخلت، افواہیں پھیلانے اور دھمکی آمیز رویے پر تشویش کا اظہار کرتے ہوئے کہا کہ نجی اور خاندانی معاملات کو عوامی بحث بنانے سے گریز کیا جانا چاہئے کیونکہ ایسے اقدامات کے قانونی نتائج بھی ہو سکتے ہیں۔
اہلِ خانہ نے عوام سے اپیل کی ہے کہ وہ احترام اور ہمدردی کا مظاہرہ کریں اور خاندان کیلئے دعا کریں تاکہ معاملات سکون اور وقار کے ساتھ حل ہو سکیں۔
