(لاہور نیوز) بالاج قتل کیس کے مرکزی ملزم طیفی بٹ کی دبئی میں ڈرامائی گرفتاری کی اندرونی کہانی سامنے آگئی۔
پولیس ذرائع کے مطابق طیفی بٹ دبئی میں ایک دعوت کے دوران ڈرامائی انداز میں گرفتار ہوا،محکمہ پولیس کے ایکسٹراڈیشن سیل کا ڈی ایس پی خالد وریا دبئی میں گوجرانوالہ کے دو اشتہاری ملزمان کی گرفتاری کے لیے موجود تھا،اشتہاری ملزمان کی گرفتاری کے لیے دبئی پولیس کے ساتھ خالد وریا نے ایک فلیٹ میں کارروائی کی۔
ذرائع نے بتایا کہ کارروائی کے دوران اسی فلیٹ میں طیفی بٹ بھی دعوت پر موجود تھا، ڈی ایس پی خالد وریا نے طیفی بٹ کو پہچان کراس کی بھی گرفتاری کا عمل شروع کر دیا، طیفی بٹ ابھی دبئی پولیس کی حراست میں ہے ۔
پولیس ذرائع کا کہنا ہے کہ طیفی بٹ کی گرفتاری کے لیے لاہور پولیس کی جانب سے ریڈ وارنٹ بھی جاری کروائے گئے تھے، طیفی بٹ کو ریڈ وارنٹ کا پراسس مکمل ہونے پر لاہور ایئرپورٹ لایا جائے گا ۔
