مریم نواز کا ملتان میں قاسم بیلہ ریلیف کیمپ کا دورہ، بچوں میں تحائف تقسیم کیے
(لاہور نیوز) وزیر اعلیٰ پنجاب مریم نواز نے پنجاب کے ضلع ملتان کا دورہ کیا جہاں قاسم بیلہ ریلیف کیمپ میں انتظامات کا جائزہ لیا۔
اپنے دورے کے دوران مریم نواز سیلاب سے متاثرہ بچوں اور خواتین میں گھل مل گئیں، انہوں نے بچوں میں پھل، چاکلیٹ، بسکٹ اور وردی پیک تقسیم کیے جبکہ بچوں کو خود اپنے ہاتھوں سے جوتے پہنائے، خواتین کو ملبوسات و دیگر تحائف بھی دیئے۔
.jpg)
وزیر اعلیٰ پنجاب فلڈ کیمپ میں ننھے بچوں کے درمیان بیٹھ گئیں جبکہ بچوں سے گپ شپ کی اور مختلف سوال پوچھے،انہوں نے بچوں سے حروف تہجی کے بارے میں پوچھا جبکہ متاثرہ خاندانوں سے مسائل اور ضروریات بارے بھی دریافت کیا۔
مریم نواز نے قاسم بیلہ فلڈ ریلیف کیمپ میں ہیلتھ، ریسکیو اور دیگر کاؤنٹرز کا جائزہ لیا، خواتین کو گھروں کی بحالی کے لیے اقدامات کا یقین دلایا اور ٹینٹوں میں صفائی اور دیگر انتظامات پر اظہار اطمینان کیا۔
کمشنر ملتان عامر کریم اور ڈپٹی کمشنر وسیم سندھو نے وزیراعلیٰ پنجاب کو انتظامات بارے بریف کیا، مریم نواز نے بچوں کے لیے کھانا، دودھ اور دیگر ضروریات پوری کرنے کی ہدایت کی جبکہ وزیر اعلیٰ کو مظفر گڑھ کے علاقے ہیڈ محمد والا میں سیلابی صورتحال پر بھی بریفنگ دی گئی۔
