گاڑیوں اور موٹرسائیکلوں کے کارڈز، فائلز اور نمبر پلیٹس کی ڈلیوری کا کنٹریکٹ ختم
(ویب ڈیسک) محکمہ ایکسائز اینڈ ٹیکسیشن نے گاڑیوں اور موٹرسائیکلوں کے کارڈز، فائلز اور نمبر پلیٹس کی ڈلیوری سے متعلق موجودہ کنٹریکٹ ختم کر دیا۔
حکام کے مطابق پاکستان پوسٹ کے ساتھ ڈلیوری کا تین سالہ معاہدہ فروری میں ختم ہو چکا تھا، جسے ڈی جی ایکسائز کی جانب سے پانچ ماہ کیلئے عارضی طور پر بڑھایا گیا تھا، یہ توسیع شدہ معاہدہ بھی گزشتہ ہفتے اپنی مدت پوری کر چکا ہے۔
ایکسائز حکام کا کہنا ہے کہ گزشتہ ساڑھے تین سال کے دوران 60 لاکھ سے زائد کارڈز، فائلز اور نمبر پلیٹس شہریوں کو فراہم کی گئیں، ابتدائی طور پر کم لاگت کے باعث پرائیویٹ کمپنی کا کنٹریکٹ ختم کرکے پاکستان جی پی او کو یہ ذمہ داری سونپی گئی تھی۔
حکام کے مطابق نئے کنٹریکٹ میں قیمتوں میں معمولی اضافہ متوقع ہے، جلد ہی نئے معاہدے کیلئے ایس او پیز مکمل کئے جا رہے ہیں، جس کے بعد ڈلیوری کا عمل دوبارہ بحال کر دیا جائے گا۔
