(لاہور نیوز) پاکستان اور بنگلہ دیش کے درمیان کرکٹ کے فروغ و امپائرز ڈویلپمنٹ پروگرامز کیلئے تعاون پر اتفاق ہوا ہے۔

وفاقی وزیر داخلہ و چیئرمین پی سی بی محسن نقوی نے بنگلہ دیش کے وزیر کھیل امور نوجوانان، لوکل گورنمنٹ و دیہی ترقی آصف محمود سے ملاقات کی، جس میں سپورٹس کے فروغ کے لئے پی سی بی اور بی سی بی میں باقاعدہ معاہدے کا فیصلہ کیا گیا۔

ملاقات میں دونوں ممالک کے درمیان کھیلوں خصوصاً کرکٹ کے فروغ و امپائرز ڈویلپمنٹ پروگرامز کیلئے تعاون پر اتفاق کیا گیا، ویمنز کرکٹ ڈویلپمنٹ پروگرامز کیلئے اشتراک کار بڑھانے پر بات چیت ہوئی۔

محسن نقوی نے بنگلہ دیش کے امپائرز کو پاکستان میں ٹریننگ کی دعوت بھی دی۔

ملاقات میں نوجوانوں کی سکلز ڈویلپمنٹ اور روزگار سے متعلق مشترکہ اقدامات کی ضرورت پر زور دیا گیا، اعلیٰ تعلیم، سکالر شپ پروگرامز اور تعلیمی میدان میں ایک دوسرے کے تجربات سے فائدہ اٹھانے پر گفتگو کی گئی، سولر انرجی میں جدت اور باہمی تعاون بڑھانے کے حوالے سے بھی بات چیت کی گئی۔

وزیر داخلہ نے شناختی دستاویزات کو فول پروف بنانے خصوصاً نادرا کے محفوظ سکیورٹی نظام سے متعلق بتایا، بنگلہ دیشی وزیر آصف محمود نے نادرا کے نظام میں گہری دلچسپی کا اظہار کیا۔

محسن نقوی نے بنگلہ دیش کے وفد کو نادرا کے دورے کی دعوت دی جس پر بنگلہ دیش کا اعلیٰ سطح کا وفد جلد پاکستان آ کر نادرا کا دورہ کرے گا۔

وفاقی وزیر داخلہ محسن نقوی کا کہنا تھا کہ پاکستان اور بنگلہ دیش کی زیادہ تر آبادی نوجوانوں پر مشتمل ہے، سپورٹس سرگرمیوں کے فروغ سے یوتھ ڈویلپمنٹ کے مواقع سے استفادہ کیا جا سکتا ہے۔

بنگلہ دیش کی وزارت سپورٹس و یوتھ کے سیکرٹری محبوب العالم، سیکرٹری لوکل گورنمنٹ رضا المقصود، پاکستانی ہائی کمیشن کے ناظم الامور محمد واصف، کرکٹ ٹیم کے ہیڈ کوچ مائیک ہیسن، منیجر نوید اکرم چیمہ اور اعلیٰ افسران بھی اس موقع پر موجود تھے۔

یہ ملاقات بنگلہ دیش اور پاکستان کے درمیان کثیرالجہتی تعلقات خصوصاً نوجوانوں، کھیل، تعلیم اور تجدید پذیر توانائی کے شعبوں میں تعاون کو نئی بلندیوں تک لے جانے کی امید کو تقویت دیتی ہے۔

Follow Lahore News on X

Install our App