شہر قائد میں محمود خان اچکزئی، صاحبزادہ حامد رضا، اسد قیصر اور سردار لطیف کھوسہ کے ہمراہ میڈیا سے گفتگو کرتے ہوئے سلمان اکرم راجہ کا کہنا تھا کہ اقلیتوں کو حقوق حاصل ہیں، ہم سب کے حقوق یکساں ہیں، ہم سب نے اپنےحقوق کے لیے اکٹھے لڑنا ہے۔

انہوں  نے کہا کہ پاکستان کے عوام کو جمہوریت اور حقوق چاہئیں، عوام چاہتے ہیں ان کے ووٹ کی عزت ہو، جمہوریت کے علاوہ پاکستان کا اور کوئی مستقبل نہیں۔

سیکرٹری جنرل پی ٹی آئی کا کہنا تھا کہ عمران خان  نے خط کے ذریعے اداروں اور قوم کے ضمیر کو جھنجھوڑا ہے، وہ خط کے ذریعے کوئی ریلیف نہیں مانگ رہے، بانی اداروں کو کہہ رہے ہیں، آئین کی پاسداری کرو، تمام اداروں  نے اپنی حدود میں رہ کر کام کرنا ہے۔

سلمان اکرم راجہ نے کہا کہ یہ پارلیمان عوام کی نمائندہ نہیں ہے، وفاق کی جانب سے صوبوں کو ان کے حقوق نہیں دیئے جا رہے ہیں۔

سردار لطیف کھوسہ

رہنما تحریک انصاف سردار لطیف کھوسہ  نے کہا کہ 26 نومبر کو نہتے مظاہرین پر گولیاں چلائی گئیں، وزیر اعظم شہباز شریف، وزیر داخلہ،خواجہ آصف، آئی جی پنجاب ذمہ دار ہیں، یہ فسطایئت کا دور ہے، ملک کو بےآئین سر زمین بنا دیا گیا ہے، پیکا ایکٹ کو مسترد کرتے ہیں، انہوں  نے کہا کہ بانی  نے بھی اسی لیے چیف جسٹس کو خط لکھا، چیف جسٹس نے کہا عمران کے خط کو آئینی بینچ کو بھیج دیا ہے۔

صاحبزادہ حامد رضا

چیئرمین سنی اتحاد کونسل صاحبزادہ حامد رضا کا کہنا تھا کہ 26 نومبر کی ہمیں سی سی ٹی وی فوٹیج نہیں دی گئیں، یہ ڈھٹائی کے ساتھ جھوٹ بولتے ہیں، بانی نے وہی خط چیف جسٹس پاکستان کو بھی بھیجا ہے۔

اسد قیصر

رہنما تحریک انصاف اسد قیصر  نے کہا کہ ہماری حکومت میں ایک ڈرون حملہ نہیں ہوا تھا اور افغانستان کے ساتھ دوستانہ تعلقات تھے، خیبرپختونخوا کا مسئلہ امن و امان نہیں غلط فارن پالیسی کی وجہ سے ہے، تحریک انصاف کی حکومت نے افغانستان کے ساتھ تجارت کو فروغ دیا۔