اسلام آباد میں موسمیاتی تبدیلی پر منعقدہ بین الاقوامی کانفرنس سے خطاب کرتے ہوئے جسٹس سید منصور علی شاہ کا کہنا تھا کہ عدلیہ کا موسمیاتی انصاف پر مؤقف دوں گا، سیلاب سے پاکستان کو 30 ارب روپے کا نقصان ہوا، پاکستان موسمیاتی تبدیلیوں سے متاثرہ ترین ممالک میں شامل ہے، سیلاب اور آفات نے ملک کو متاثر کیا۔

انہوں نے کہا کہ گلیشیئرز تیزی سے پگھل رہے ہیں جو انڈس سسٹم کو متاثر کر رہے ہیں، زراعت کے شعبے سے منسلک افراد متاثر ہو رہے ہیں، معائنہ کا وقت گزر گیا ہے، ہمیں کلائمیٹ سائنس سمجھنی ہو گی اور حل تلاش کرنے ہوں گے، موسمیاتی عدالت کے قیام کی بھی ضرورت ہے۔

جسٹس منصور علی شاہ کا کہنا تھا کہ ہمیں ماحولیاتی مسائل کا فوری طور پر تدارک کرنا ہو گا اور موسمیاتی احتساب کا نظام لانا ہو گا، ماحولیاتی انصاف کے لیے فوری اقدامات بہت ضروری ہیں۔

سپریم کورٹ کے جج  نے کہا کہ عدالت آج کل کیا کر رہی ہے اس پر بتاتا ہوں، ماضی میں ہائی کورٹ میں موسمیاتی تبدیلی کا مسئلہ اٹھایا گیا تو حکومت اس سے آگاہ ہی نہیں تھی، موسیماتی تبدیلی انصاف کا معاملہ ہے، کوئی حکومتی ادارہ نہیں کہتا کہ فنانشل وسائل کی کمی ہے، عدلیہ کے فیصلے اور حکومتی فنانس کے حالات مختلف تھے، فنڈ کے بغیر یہ ایک خواب ہے۔

جسٹس منصور علی شاہ کا کہنا تھا کہ موسمیاتی تبدیلی انسان کی ہر چیز کو متاثر کرتی ہے، موسمیاتی فنانس ایک بنیادی حق ہے، اس کی ایک ضرورت ہے ہمیں کلائمیٹ چینج اتھارٹی اور کلائمیٹ چینج فنڈ قائم کرنا ہو گا، پاکستان کو موسیماتی تبدیلی کا خطرہ ہے، یہاں نہ اتھارٹی ہے اور نہ ہی کلائمیٹ چینج اکاؤنٹ میں ایک بھی روپیہ ہے۔

انہوں نے مزید کہا کہ گلوبل فنڈز نہیں آ رہے ہمیں اپنے فنانس پیدا کرنے ہوں گے، نیچر فنانس ایک نیا تصور ہے، کلائمیٹ جمہوریت بہت ضروری ہے یہ سکوک فنڈنگ کے لیے بہترین ہو گا۔