(لاہور نیوز) مسلم لیگ ن کے سینئر رہنما جاوید لطیف کا کہنا ہے ایک لابنگ فرم کو ہائر کرکے ریاست پاکستان کیخلاف استعمال کیا گیا۔

ماڈل ٹاؤن میں پریس کانفرنس کرتے ہوئے جاوید لطیف نے کہا دنیا میں کہیں نہیں دیکھا گیا کہ ایک جماعت کو لابنگ کے ذریعے استعمال کیا گیا، ذوالفقارعلی بھٹو نے تختہ دار پر بھی سول نافرمانی کی تحریک کا اعلان نہیں کیا، نواز شریف نے بھی جیل میں ہونے کے باوجود سول نافرمانی کی تحریک کا اعلان نہیں کیا، آج کے حالات میں پورا سچ نہیں بولا جا رہا، قوم کو بتایا جائے کہ 2018 میں کن کی خواہشات پر بانی پی ٹی آئی کو لایا گیا۔

مسلم لیگ ن کے سینئر رہنما جاوید لطیف کا کہنا تھا کوئی ہمیں غلام سمجھ کر حکم دے گا تو ہم ایک قوم بن کر نظر آئیں گے، 1965 میں بھی ثابت کیا تھا کہ ہم ایک قوم ہیں، 1998میں بھی ہم نے ایک قوم بن کر ایٹمی دھماکے کرکے دکھائے تھے، سانحہ 9 مئی کے ماسٹر مائنڈ کو تاحال سزا نہ مل سکی، مذاکرات کا ایک ہی ایجنڈا ہے بانی پی ٹی آئی کی رہائی۔

 مسلم لیگ ن کے سینئر رہنما بولے بانی پی ٹی آئی آج عالمی قوتوں کا کیوں منظورِنظر ہے؟ ہمیں اپنی آزادی اور غیرت سے کوئی چیز بالاتر نہیں ہے، مذاکرات کے نام پر ہمیں کیوں بھاشن دیئے جا رہے ہیں؟ یہ قوم دباؤ میں آکر کمپرومائز نہیں کرے گی،اگر بانی پی ٹی آئی کو رہا کیا گیا تو دنیا یہی کہے گی کہ دباؤ میں آ کر یہ فیصلہ کیا گیا۔

 جاوید لطیف کا مزید کہنا تھا انسانی حقوق فلسطین، لبنان، شام اور مقبوضہ کشمیر میں نظر نہیں آئے، کسی کو انسانی حقوق اور جمہوریت مختلف ممالک پر چڑھائی کرتے وقت نظر نہیں آئے، فلسطین، لبنان اور شام کے بعد ایران پر نظریں ہیں، ایران پر نظریں جمانے کا مقصد پاکستان پر دباؤ بڑھانا ہے، ہم کسی صورت عالمی قوتوں کے دباؤ میں نہیں آئیں گے۔

Follow Lahore News on Facebook

Install our App