اسلام آباد میں ایس سی او کیلئے میڈیا فسیلی ٹیشن سینٹر کے افتتاح کے بعد پریس کانفرنس کرتے ہوئے وزیر اطلاعات عطا تارڑ کا کہنا تھا کہ شنگھائی تعاون تنظیم کا اجلاس ہونے جا رہا ہے، یہ ہمارے لیے فخر اور اعزاز کی بات ہے، ہمارا خواب ہے جی 20 کا اجلاس بھی یہاں منعقد ہو، پاکستانی بہت میزبان لوگ ہیں۔

انہوں نے کہا کہ شنگھائی تعاون تنظیم میں آنے والے صحافیوں کیلئے میڈیا سہولت سینٹرکا اجرا کیا گیا ہے، اپنی پوری ٹیم کو شاباش دوں گا، دنیا سے آنے والے صحافیوں کیلئے بین الاقوامی معیار کے انتظامات کیے ہیں، سٹیٹ آف دی آرٹ میڈیا سینٹر بنایا ہے، باہر سے آنے والے اور لوکل صحافیوں کو خوش آمدید کہتا ہوں۔

وزیر اطلاعات کا کہنا تھا کہ پاکستان نے ریڈ ٹیپ سے ریڈکارپٹ تک کا سفر طے کیا ہے، ملائیشیا کے وزیر اعظم  نے پاکستان کا کامیاب دورہ کیا، ہم دنیا کیلئے سینٹرل لوکیشن بن چکے ہیں، پالیسی ریٹ نیچے جانے سے سرمایہ کاری بڑھ رہی ہے، مہنگائی 32 فیصد سے 6.9 فیصد پر آگئی ہے، فارن ایکسچینج ریزرو بڑھ گئے ہیں، بلوم برگ نے پاکستان کی سٹاک مارکیٹ کو ایمرجنگ مارکیٹ ڈکلیئر کیا ہے۔

عطا تارڑ  نے کہا کہ دنیا مان رہی ہے پاکستان سرمایہ کاری کیلئے محفوظ جگہ ہے، آج چین کے وزیر اعظم 11سال بعد تشریف لائے ہیں، چین کی طرف سے ہمیشہ دوستی کا ہاتھ بڑھایا گیا، نواز شریف کے دور میں موٹرویز کا جال بچھایا گیا، چینی کمپنیز کو بہت فائدہ ہے اگر وہ یہاں سے دوسرے ممالک کو ایکسپورٹ کریں، ہم چینی انڈسٹریز کو پاکستان میں وسائل فراہم کریں گے۔

ان کا مزید کہنا تھا کہ ایس سی او کے اپنے پروٹوکول ہیں، پاک بھارت معاملہ ایس سی او پروٹوکولز کے مطابق ہے، ہم تمام آنے والوں مہمانوں کو خوش آمدید کہتے ہیں، ہم  نے ثابت کیا ہے کہ یہاں ایس سی او کی میزبانی کرنا جانتے ہیں، ہم نے دنیا کو ثابت کیا ہے کہ ہم مہمان نواز ہیں۔