(ویب ڈیسک) پاکستانی باصلاحیت سینئر اداکار ایوب کھوسو نے کہا ہے کہ آج کل ڈرامہ انڈسٹری مذاق بن کر رہی گئی ہے جس میں غیر پیشہ ورانہ رویہ اختیار کر لیا گیا ہے۔

حال ہی میں ایوب کھوسو نے دنیا ٹی وی کے معروف مزاحیہ پروگرام "مذاق رات" میں بطور مہمان شرکت کی، پروگرام میں انہوں نے ڈرامہ انڈسٹری کے غیر پیشہ ورانہ رویے پر کھل کر اپنے خیالات کا اظہار کیا۔

دوران انٹرویو میزبان عمران اشرف نے اداکار سے ماضی اور موجودہ ڈرامہ انڈسٹری کے حالات کے حوالے سے سوال کیا جس پر ایوب کھوسہ نے جواب دیا کہ آج کل فنکاروں کے ساتھ یہ مذاق بہت ہو رہا ہے کہ وہ سیٹ پر جاتے ہیں لیکن انہیں علم ہی نہیں ہوتا کہ آج کون سا سین کرنا ہے۔

انہوں نے کہا کہ ڈرامہ انڈسٹری میں غیر پیشہ ورانہ رویہ اختیار کر لیا گیا ہے، سیٹ پر موجود ایسوسی ایٹ یا اسسٹنٹ کو صرف یہ معلوم ہوتا ہے کہ آج کتنے سین ریکارڈ کروانے ہیں، انہیں اس بات سے مطلب نہیں ہوتا کہ سین کا معیار کیا ہے یا اس کی ضرورت کیا ہے، انہیں صرف تعداد کی فکر ہوتی ہے۔

ایوب کھوسو نے بتایا کہ ایک بار میں ایک پروڈیوسر کے کمرے میں موجود تھا کہ وہاں اسسٹنٹ آیا اور بتایا کہ ہم نے آج 18 میں سے 15 سین ریکارڈ کر لیے ہیں تو پروڈیوسر کو اس بات کی فکر نہیں تھی کہ جو سین ریکارڈ ہوئے ہیں وہ کیسے اور کن مشکلات کے بعد ریکارڈ ہوئے ہیں، اسے صرف باقی رہ جانے والے سینز کی پرواہ تھی۔

سینئر اداکار نے کہا کہ آج غیر پیشہ ورانہ رویے کے ذمے دار اداکار خود نہیں ہیں بلکہ اب ماحول ایسا بن گیا ہے، بے شک آج بھی اچھا کام کرنے والے موجود ہیں لیکن زیادہ تعداد ایسے لوگوں کی ہے جو مقدار پر یقین رکھتے ہیں۔

Follow Lahore News on Twitter

Install our App