(لاہور نیوز/ ویب ڈیسک) پاکستان تحریک انصاف (پی ٹی آئی) کے احتجاج کے باعث جڑواں شہروں کو ملانے والے تمام راستے تیسرے روز بھی بند ہیں جبکہ موبائل فون سروس بحال ہونا شروع ہوگئی ہے۔

احتجاج کے باعث جڑواں شہروں کے بیشتر کاروباری مراکز بند ہیں اور معمولات زندگی بری طرح متاثر ہیں، مری روڈ تین دن سے ہر طرح کی ٹریفک کیلئے بند ہے، مری روڈ کی طرف آنیوالی گلیوں اورراستوں پر کنٹینرز موجود ہیں، راستوں کی بندش سے شہریوں کو مشکلات کا سامنا ہے۔

لیاقت باغ راولپنڈی سے فیض آباد تک جگہ جگہ رکاوٹیں موجود ہیں، پنجاب پولیس کی نفری جگہ جگہ تعینات اور سکیورٹی ہائی الرٹ ہے، راستوں کی بندش کے باعث مریضوں کا ہسپتال پہنچنا بھی دشوار ہو گیا ہے۔

اسلام آباد میں موبائل فون سروس بحال ہونا شروع ہوگئی ہے، موبائل فون سروس گزشتہ 3 روز سے بند تھی جبکہ میٹرو بس سروس تیسرے روز بھی معطل ہے۔

وفاقی دارالحکومت میں پی ٹی آئی کے احتجاج کے معاملے پر مظاہرین کی ممکنہ پیش قدمی روکنے کیلئے ڈی چوک میں پاک فوج، رینجرز اور پولیس کے تازہ دم دستے موجود ہیں۔

مظاہرین کو اقتدار شہر سے نکالنے کیلئے انتظامیہ کا رات بھر آپریشن جاری رہا جبکہ اسلام آباد پولیس کے اعلیٰ افسران نے رات گئے جناح ایونیو کا دورہ کیا اور آپریشن کا جائزہ لیا۔

اسلام آباد کی حدود میں ایکسپریس وے، کشمیر ہائی وے ٹریفک کیلئے کھلی ہے، مری روڈ اور ایئرپورٹ روڈ ٹریفک کیلئے کھلے ہیں تاہم ریڈ زون جانے اور آنے والے تمام راستے بند ہیں، اسلام آباد سے لاہور جانے کے لئے موٹروے ایم ون ٹریفک کے لئے کھلی ہے، ایم ون پر کھودی گئی خندقوں کو بھر دیا گیا ہے، اسلام آباد سے پشاور جانے کیلئے موٹر وے ایم ٹو بھی کھول دی گئی ہے۔

دوسری جانب چیف ٹریفک آفیسر (سی ٹی او) لاہور عمارہ اطہر نے کہا ہے کہ شہر کے تمام داخلی و خارجی راستے ٹریفک کیلئے کھلے ہیں۔

سی ٹی او لاہور کا کہنا ہے کہ صوبائی دارالحکومت کے تمام باسی بآسانی شہر میں اور شہر کے باہر جا سکتے ہیں، ایسٹرن بائی پاس بھی ٹریفک کیلئے کھول دیا گیا ہے، بابو صابو، ٹھوکر نیاز بیگ، شاہدرہ، سگیاں سمیت تمام داخلی و خارجی راستوں پر ٹریفک معمول کے مطابق رواں دواں ہے۔

Subscribe Lahore News on YouTube

Install our App