(لاہور نیوز) نگران وزیراعلیٰ پنجاب محسن نقوی نے پی ایس ایل کے 9ویں ایڈیشن کے دوران سکیورٹی اور شائقین کرکٹ کیلئے شاندار انتظامات کی ہدایت کردی۔

وزیراعلیٰ پنجاب  محسن  نقوی کی زیر صدارت  خصوصی اجلاس ہوا جس میں میگا ایونٹ کیلئے انتظامات اور سکیورٹی پلان کا جائزہ لیا گیا، اجلاس میں چیف سیکرٹری زاہد اختر زمان، انسپکٹرجنرل پولیس ڈاکٹر عثمان انور، سیکرٹری داخلہ، سیکرٹری تعمیرات و مواصلات، سی سی پی او  اورکمشنر لاہور شریک ہوئے۔

چیف آپریٹنگ آفیسر پی سی بی، ڈپٹی کمشنر لاہور، ڈی آئی جی آپریشنز،سی ٹی او لاہور اور متعلقہ حکام نے اجلاس میں شرکت کی جبکہ ملتان اور راولپنڈی کے کمشنرز، آرپی اوز، سی پی اوز اور ڈپٹی کمشنرز ویڈیو لنک کے ذریعے اجلاس میں شریک ہوئے۔

اجلاس کے دوران آئی جی پنجاب ڈاکٹر عثمان انور نے بریفنگ میں بتایا کہ 16 ہزار سے زائد پولیس نفری پی ایس ایل میچوں میں سکیورٹی کے فرائض سرانجام دے گی،لاہور، راولپنڈی اور ملتان میں میچوں کے لیے سکیورٹی پلان تیار کر لیا ہے۔

 وزیراعلیٰ محسن نقوی نے لاہور سمیت راولپنڈی اور ملتان میں میچوں کے لیے وضع کردہ سکیورٹی پلان پر من و عن عمل درآمد کی ہدایت کرتے ہوئے کہا کہ پی ایس ایل 9 کے میچوں کا آغاز 17فروری سے ہو رہا ہے، تمام تر انتظامات کو خوب سے خوب تر ہونا چاہیے۔

محسن نقوی  نے کہا کہ میچوں کے دوران ٹریفک کی روانی کوبرقرار رکھنے کے لئے موثر مینجمنٹ کی جائے، عوام کی سہولت کے پیش نظر ٹریفک کی بندش کا دورانیہ کم سے کم ہونا چاہیے، شہریوں کو میڈیا کے ذریعے متبادل روٹس سے بروقت آگاہ کیاجائے۔

وزیراعلیٰ کا کہنا تھا کہ متعلقہ ادارے اورمحکمے آپس میں قریبی رابطہ رکھتے ہوئے فرائض سرانجام دیں، جتنا بڑا ایونٹ ہے اس لحاظ سے انتظامات ہونے چاہئیں، شائقین کرکٹ کو پرامن اور محفوظ ماحول فراہم کیا جائے گا۔

Follow Lahore News on Twitter

Install our App