(لاہور نیوز) نگران وزیراعلیٰ پنجاب محسن نقوی کا راولپنڈی کے شہریوں کے لئے بڑا تحفہ، پیر ودھائی موڑ سے کچہری چوک تک سگنل فری کوریڈور بنے گا۔

منصوبے کے تحت اصغر مال روڈ کی تعمیر و توسیع ہو گی، وزیراعلیٰ محسن نقوی نے پیرودھائی موڑ سے کچہری چوک تک سگنل فری کوریڈور پراجیکٹ کا سنگ بنیاد رکھ دیا۔

 وزیراعلیٰ پنجاب محسن نقوی نے اصغر مال روڈ کے تعمیراتی کاموں کا آغاز کیا۔ اس موقع پر محسن نقوی نے بتایا کہ راولپنڈی کے مصروف ترین چوراہوں پر ٹریفک لوڈ کم کرنے کے 7.6 کلومیٹر طویل سگنل فری کوریڈور میگا منصوبے پر 8.2 ارب روپے لاگت آئے گی، منصوبے کے تحت 3 انڈر پاسز اور دو پروٹیکٹڈ یو ٹرن بنائے جائیں گے۔

وزیراعلیٰ محسن نقوی نے کہا کہ  راولپنڈی میں ٹریفک کے دیرینہ مسائل مستقل بنیادوں پر حل کررہے ہیں، قاسم مارکیٹ پر سنگل بیرل، جی پی او چوک اور پی سی چوک پر ڈبل بیرل انڈر پاسز بنائیں گے، اصغر مال روڈ کی مری روڈ سے چونگی نمبر 4 تک تعمیر نو کی جا رہی ہے، پوری کوشش ہے کہ اصغر مال روڈ کو مقررہ وقت سے قبل مکمل کیا جائے، سڑک کے اطراف آبادی کی سیوریج لائنوں کی صفائی کو یقینی بنایا جائے گا تاکہ آبادی کا پانی سڑک پر نہ آئے۔

محسن نقوی نے ہدایت کی ہے کہ  تعمیر و توسیع کے دوران سڑک پر روڈ سٹڈز، کیٹ آئیز اور ٹریفک سگنلز لگائے جائیں، اصغر مال روڈ شہر کے گنجان آباد علاقے میں موجود ہونے کی وجہ سے شہریوں کو بہت سی مشکلات کا سامنا کرنا پڑتا تھا، لنک روڈز کی مرمت و بحالی سے شہر میں ٹریفک کے مسائل حل ہوں گے۔

وزیراعلیٰ محسن نقوی کو دونوں منصوبوں کے بارے میں بریفنگ دی گئی۔ صوبائی وزراء ایس ایم تنویر، ڈاکٹر جاوید اکرم، عامر میر، ڈاکٹر جمال ناصر، ابراہیم حسن مراد، چیف سیکرٹری، چیئرمین پلاننگ اینڈ ڈویلپمنٹ بورڈ،سیکرٹری تعمیرات و مواصلات،سیکرٹری صحت،سیکرٹری لوکل گورنمنٹ، سیکرٹری صنعت،کمشنر راولپنڈی، آر پی او، ڈپٹی کمشنر اور متعلقہ حکام بھی اس موقع پر موجود تھے۔

Subscribe Lahore News on YouTube

Install our App