(ویب ڈیسک) معروف پاکستانی یوٹیوبر اسد نے اسلام کی خاطر اپنی بیوی نمرہ کے ساتھ ولاگنگ نہ کرنے کا فیصلہ کرلیا۔

رپورٹ کےمطابق اسد نے اپنی سوشل میڈیا پوسٹ میں اعلان کیا کہ وہ اب اپنے وی لاگز میں اپنی بیوی نمرہ اور گھر کی دیگر خواتین کو نہیں دکھائیں گے۔اسد نے کہا کہ بہت سے لوگ مجھ سے پوچھ رہے ہیں کہ میں نے فیملی وی لاگنگ کیوں چھوڑ دی ؟تو اس کا جواب یہ ہے کہ ہم ہمیشہ پیسے اور دنیاوی خواہشات کے پیچھے بھاگتے ہیں، ہم اللہ اور اسلامی تعلیمات کے بارے میں کبھی نہیں سوچتے۔

یوٹیوبر نے کہا کہ میں نے ان لوگوں کے بارے میں پڑھا جنہیں اللہ کبھی معاف نہیں کرے گا، اُن میں سب سے پہلے والدین کی نافرمانی کرنے والی اولاد ہوگی، دوسرے نمبر پر وہ لوگ ہیں جو اپنی جنس کے بجائے مخالف جنس کے لباس زیب تن کرتے ہیں اور تیسرے نمبر پر وہ لوگ ہوں گے جو اپنی بیویوں کو دُنیا کے سامنے دکھاتے ہیں۔

اسد نے کہا کہ یہ پڑھنے کے بعد میں نے فوری طور پر اپنا ذہن بنا لیا اور اپنی فیملی کو سوشل میڈیا پر مزید نہ دکھانے کا فیصلہ کیاکیونکہ میں اللہ اور اسلامی تعلیمات کی مزید خلاف ورزی نہیں کرسکتا۔اُنہوں نے مزید کہا کہ میں وی لاگنگ نہیں چھوڑ رہا، اب آپ میرے وی لاگز میں صرف مجھے اور میرے بیٹے اذلان کو دیکھ سکیں گے اور گھر کی کوئی خاتون وی لاگ کا حصہ نہیں ہوگی۔

مداح اسد کے اس فیصلے کی خوب تعریف کررہے ہیں اور اُنہیں مستقبل میں بھی اس فیصلے پر قائم رہنے کے لیے دُعا بھی کررہے ہیں، مداحوں نے دوسرے یوٹیوبرز کے لیے بھی دعا کی جو ہمیشہ کیمرے کے سامنے رہتے ہیں۔

واضح رہےکہ فروری 2020 میں سوشل میڈیا پر ایک نوجوان جوڑے اسد اور نمرہ کی شادی کی تصاویر وائرل ہوئی تھیں، دونوں نے اپنی زندگی کا اہم فیصلہ لیتے ہوئے 18 سال کی عمر میں شادی کرلی تھی اور سال 2022 میں اس جوڑے کے ہاں بیٹے کی پیدائش ہوئی تھی جس کا نام انہوں نے اذلان رکھا۔

Follow Lahore News on Twitter

Install our App