(ویب ڈیسک) ایشیا کپ 2023 کے سری لنکا میں ہونے والے میچز کے ٹکٹس کی فروخت شروع ہو گئی ہے۔

 2 ستمبر کو پاکستان اور بھارت کے درمیان میچ شیڈول ہے۔ اس حوالے سے بیشتر ٹکٹس چند گھنٹوں میں فروخت ہو گئے۔ میچ کے ٹکٹس کی کم سے کم قیمت 8 ہزار 700 روپے اور زیادہ سے زیادہ قیمت 87 ہزار روپے رکھی گئی ہے۔ ذرائع کے مطابق ایک شناختی کارڈ یا پاسپورٹ پر زیادہ سے زیادہ 4 ٹکٹ خریدے جا سکتے ہیں، جبکہ پاکستان اور بھارت کے میچ کے لیے ایک شناختی کارڈ یا پاسپورٹ پر 2 ٹکٹ خریدے جاسکتے ہیں۔

کولمبو میں کھیلے جانے والے سپر فور مرحلے کے میچز کے ٹکٹس کی کم سے کم قیمت 10 ڈالر رکھی گئی ہے جبکہ ٹکٹ کی زیادہ سے زیادہ قیمت 400 ڈالر ہے۔ اس کے علاوہ کینڈی میں کھیلے جانے والے بنگلادیش اور سری لنکا کے میچ کے ٹکٹ کی کم سے کم قیمت 5 ڈالر ہے جبکہ گرینڈ اسٹینڈ کے ٹکٹس کی قیمت 50 ڈالر رکھی گئی ہے۔

ایونٹ میں پاکستان اور بھارت کے میچ کیلئے ٹکٹس آن لائن آتے ہی شائقین کرکٹ نے بکنگ کروا لی۔ بیشتر ٹکٹس چند گھنٹوں ہی میں فروخت ہو گئے۔ پاکستان اور بھارت کے درمیان میچ کے وی آئی پی ٹکٹس کی قیمت 87 ہزار روپے جبکہ ٹکٹ کی کم سے کم قیمت 8 ہزار 700 روپے ہے۔

سری لنکا میں ایشیا کپ کے 9 میچز کھیلے جائیں گے جس میں فائنل بھی شامل ہے، سری لنکا میں ایشیا کپ کے میچوں کا آغاز 31 اگست کو پالی کیلے میں سری لنکا اور بنگلہ دیش کے درمیان ہو گا جبکہ 2 ستمبر کو پاکستان اور بھارت کی ٹیمیں مدمقابل ہونگی۔

واضح رہے کہ ایشیا کپ کے پاکستان میں کھیلے جانے والے میچوں کے ٹکٹوں کی فروخت شروع ہو چکی ہے، پاکستان میں ایشیا کپ کا افتتاحی میچ 30 اگست کو ملتان میں پاکستان اور نیپال کے درمیان کھیلا جائے گا۔

Follow Lahore News on Facebook

Install our App