(لاہور نیوز) نگران وزیراعلیٰ پنجاب محسن نقوی نے تھانہ مزنگ اورتھانہ سول لائنز کا دورہ کیا، سائلین نے رشوت کی شکایات کے انبار لگا دیئے، صوبائی وزیراطلاعات عامر میر بھی ہمراہ تھے۔

نگران وزیراعلیٰ پنجاب محسن نقوی کے دورے کے دوران دونوں تھانوں کی بری حالت دیکھنے میں آئی، صفائی کے ناقص انتظامات تھے اور فرنٹ ڈیسک بھی درست کام نہیں کر رہا تھا،عملہ صورتحال پر تسلی بخش جواب نہ دے سکا، تھانوں میں موجود لوگوں نے دادرسی نہ ہونے کی شکایات کیں۔

ایک لڑکے کی جانب سے رشوت لینے کی شکایت پر کانسٹیبل کو گرفتار کر لیا گیا۔ وزیراعلیٰ محسن نقوی کی ہدایت پرلڑکے سے لی گئی رشوت کی رقم واپس کی گئی۔ وزیراعلیٰ نے رشوت لینے والے کانسٹیبل کے خلاف محکمانہ کارروائی کا حکم دے دیا۔

 وزیراعلیٰ محسن نقوی نے دونوں تھانوں کی حالت زار دیکھ کر شدید برہمی کا اظہار کیا اور انسپکٹر جنرل پولیس کو تین روز کے اندر دونوں تھانوں میں بہتری لانے کی ہدایت کر دی۔

 وزیراعلیٰ محسن نقوی نے تھانوں میں موجودسائلین سے ان کے کیسز کے بارے میں پوچھا اور فوری دادرسی کے لئے موقع پر ہی احکامات جاری کئے۔ وزیراعلیٰ محسن نقوی نے حوالات میں بند قیدیوں سے بھی ان کے کیسز کے بارے میں استفسار کیا۔

 وزیراعلیٰ محسن نقوی نے فرنٹ ڈیسک میں درج ہونے والی درخواستوں پر کارروائی کا جائزہ لیا اور بعض درخواستوں پر کوئی پیشرفت نہ ہونے پر ناراضگی کا اظہار کیا۔وزیراعلیٰ محسن نقوی نے تھانے میں روزنامچہ بھی چیک کیا۔

وزیراعلیٰ محسن نقوی کا کہنا تھا کہ دونوں تھانوں کا دورہ کرکے مایوسی اورزمینی حقائق سے آگاہی ہوئی، تھانوں میں مظلوم کی دادرسی کا موثر نظام ہی انصاف کی بنیاد ہے، دونوں تھانوں کو بہتر بنانے کیلئے آئی جی پولیس کو ٹاسک دے دیا ہے۔

Subscribe Lahore News on YouTube

Install our App