(ویب ڈیسک) جنوبی افریقا کے سابق جارح مزاج بیٹر ہرشل گبز کا کہنا ہے کہ پاکستان کرکٹ ٹیم آئی سی سی کرکٹ ورلڈ کپ کی فیورٹ ٹیموں میں سے ایک ہے، ٹاپ فور میں پاکستان ٹیم پہنچے گی کیونکہ اس کے لیے کنڈیشنز سازگار ہیں ۔

ساؤتھ افریقا کی جانب سے 90 ٹیسٹ ، 248 ون ڈے میچز اور 23 ٹی ٹوئنٹی کھیلنے والے ہرشل گبز نے نیشنل کرکٹ اکیڈمی میں انڈر 13 اور انڈر 16 ایج گروپ کوچنگ پروگرام میں حصہ لیا ۔

اس موقع پر انہوں نے کہا کہ پاکستان ٹیم ورلڈ کپ کی فیورٹ ٹیموں میں شامل ہے، عدم تسلسل ضرور ہے  لیکن سب جانتے ہیں کہ پاکستان ٹیم میچ ڈے پر کیسے کلک کر سکتی ہے اور اس کی وجہ یہ ہے کہ پاکستان ٹیم میں ہمیشہ ایکس فیکٹر پایا جاتا ہے، یہی وجہ ہے کہ وہ خطرناک ٹیم ہے ، ورلڈ کپ کی کنڈیشنز پاکستان کیلئے سازگار ہیں ، یہ ٹیم ٹاپ فور میں شامل ہو گی۔

بابراعظم کو ہرشل گبز کیا بتانا چاہتے ہیں ؟

جارح مزاج بیٹر ہرشل گبز پاکستان کرکٹ ٹیم کے کپتان بابر اعظم کے فین ہیں، وہ پاکستان سپر لیگ میں بابراعظم کے ساتھ کام کر چکے ہیں۔

ہرشل کا ماننا ہے کہ بابراعظم تسلسل کے ساتھ رنز کرنا جانتے ہیں جو کہ ناقابل یقین ہے ،ان کا ٹیمپرامنٹ شاندار ہے، وہ رنز کرنا جانتے ہیں، ان میں رنز بنانے کی بھوک بھی ہے، وہ جتنے بھی رنز بنا لیں، مطمئین نہیں ہوتے۔

گبز نے کہا کہ ان کے بارے میں کہا جاتا ہے کہ وہ کم تیزی سے رنز بناتے ہیں وہ سٹرائیک ریٹ بہتر کرنا جانتے ہیں ، میرے خیال میں وہ سٹرائیک ریٹ کے لیے کچھ رنز کی قربانی دے سکتے ہیں، میں کچھ آئیڈیا پر ان سے بات کروں گا ،لیکن کچھ بھی کہہ لیں وہ بہترین بیٹرز میں سے ہیں۔

انہوں نے کہا کہ بابراعظم اور ویرات کوہلی تینوں فارمیٹ تسلسل کے ساتھ کھیل رہے ہیں، تیز کھیلنے کے ساتھ رنز بنانے کی بھوک اور تسلسل بھی ہونا چاہیے، تیز رفتاری سے بنائے گئے کم رنز پرخوش نہیں ہونا چاہیے ، تسلسل ہونا چاہیے اور ٹیم کے دیے گئے رول کے مطابق ہونے چاہئیں ۔

Subscribe Lahore News on YouTube

Install our App