02 Jun 2023
(لاہور نیوز) پنجاب بھر میں خالص اور صحت بخش دودھ کی فراہمی ممکن بنانے کیلئے ڈائریکٹوریٹ آف ملک قائم کر دیا گیا۔
دودھ کے عالمی دن کے موقع پر ڈی جی فوڈ اتھارٹی راجہ جہانگیر انور نے پریس کانفرنس کرتے ہوئے کہا خالص دودھ کا حصول حاضر وقت کا سب سے بڑا مسئلہ بن چکا ہے۔ عوام تک خالص دودھ پہنچانے کے لیے الگ ڈائریکٹوریٹ آف ملک بنا دیا گیا ہے۔ ''ڈائریکٹوریٹ آف ملک ''کا مقصد بین الاقوامی طرز پر خالص دودھ کی فراہمی کا جدید نظام متعارف کروانا ہے۔ صوبہ بھر میں دودھ کے معیار کو روزانہ کی بنیاد پر ڈیری سیفٹی ٹیمیں چیک کرتی ہیں۔ یکم جنوری2017 سے اب تک فوڈ اتھارٹی نے 28 کروڑ، 29 لاکھ سے زائد دودھ کی چیکنگ کی۔ چیکنگ کے دوران 72 لاکھ 42 ہزار 562 لٹر ملاوٹی اور ناقص دودھ تلف کیا گیا۔
انہوں نے کہا دنیا بھر میں خالص دودھ کی ترسیل کے بہترین ماڈلز موجود ہیں۔ ملک ڈائریکٹوریٹ دنیا میں دودھ کی ترسیل کے کامیاب ماڈلز کا تفصیلی جائزہ لے گا۔ مکمل تحقیق کے بعد پاکستان کے وسائل اور ماحول کے مطابق نیا نظام متعارف کرایا جائے گا۔ دنیا کے ترقی یافتہ ممالک کی طرز پر دودھ کی پیداوار سے خریدار تک پہنچنے کے تمام مراحل کی مانیڑنگ کی جائے گی۔
راجہ جہانگیر انور کا مزید کہنا تھا جامع پالیسی تیار کرنے اور تمام سٹیک ہولڈرز کی باہمی مشاورت کے بعد جدید اور قابل عمل نظام لاگو کر دیا جائے گا۔ عوام تک دودھ جیسی بنیادی خوراک ملاوٹ سے پاک اور غذائیت سے بھرپور پہنچانا اولین ترجیح ہے۔
آپ کی اس خبر کے متعلق رائے
