(لاہور نیوز) صوبائی دارالحکومت لاہور میں موسم نے ایک بار پھر کروٹ لے لی۔
رات گئے شہر کے مختلف علاقوں میں ہلکی بوندہ باندی کا سلسلہ جاری رہا جس نے فضا کو خوشگوار تو بنا دیا مگر ساتھ ہی سردی کی شدت میں بھی اضافہ کر دیا، شہریوں نے صبح آنکھ کھولی تو ٹھنڈی ہوا اور نم آلود ماحول نے انہیں ایک مختلف ہی احساس سے روشناس کرایا۔
محکمہ موسمیات کے مطابق آج دن بھر سورج اور بادلوں کے درمیان آنکھ مچولی جاری رہے گی، جس کے باعث کبھی دھوپ نکلے گی تو کبھی بادل چھا جائیں گے، درجہ حرارت کم سے کم 14 جبکہ زیادہ سے زیادہ 23 ڈگری سینٹی گریڈ تک جانے کا امکان ظاہر کیا گیا ہے، جبکہ اس وقت شہر کا درجہ حرارت 16 ڈگری سینٹی گریڈ ریکارڈ کیا گیا ہے۔
فضا میں نمی کا تناسب 90 فیصد تک پہنچ چکا ہے، جس کے باعث موسم میں خنکی مزید بڑھ گئی ہے، اس کے علاوہ 5 کلومیٹر فی گھنٹہ کی رفتار سے چلنے والی ٹھنڈی ہوا نے بھی ماحول کو مزید سرد بنا دیا ہے۔
