(لاہور نیوز) وزیراعظم شہباز شریف نے 38 ارب روپے کے رمضان ریلیف پیکج کا اجرا کر دیا، ہر مستحق خاندان کو 13 ہزار روپے دیئے جائیں گے۔

وزیر اعظم محمد شہباز شریف نے تقریب سے خطاب کرتے ہوئے کہا کہ رمضان کے با برکت مہینے کی آمد آمد ہے ، اس بابرکت ماہ میں مسلمان دکھی انسانیت کے لئے اپنے وسائل تقسیم کرتے ہیں ، حکومت نے ماضی میں رمضان شریف میں عوام کو ریلیف کی فراہمی کا فرسودہ نظام ختم کر دیا ہے۔

انہوں نے کہا کہ رمضان المبارک میں پہلے یوٹیلیٹی سٹورز کے ذریعے ریلیف فراہم کیا جاتا تھا، یوٹیلیٹی سٹورز پر اشیا خورونوش کا معیار انتہائی ناقص تھا، یوٹیلیٹی سٹورز سے اشیاء کی خریداری کا عمل بھی تکلیف دہ تھا، ہم  نے گزشتہ سال اس فرسودہ نظام کو خیر آباد کہہ دیا۔

انہوں نے مزید کہا کہ گزشتہ سال رمضان میں ڈیجیٹل نظام کے ذریعے حقداروں کو نقد رقوم منتقل کی گئیں، نئے نظام کو متعارف کرانے میں بے شمار چیلنجز تھے جو کامیابی سے ہمکنار ہوئے، عوام کی شکایات سننے اور ان کے ازالے کیلئے سیل قائم کیا گیا۔

وزیراعظم  نے بتایا کہ گزشتہ سال رمضان میں 20 ارب روپے کی رقم شفاف طریقے سے مستحقین میں بلاتاخیر تقسیم ہوئی، رواں سال رمضان ریلیف پیکج کے تحت 38 ارب روپے مختص کئے گئے ہیں، یہ رقم نہ صرف چاروں صوبوں بلکہ گلگت بلتستان اور آزاد کشمیر میں مستحق خاندانوں میں تقسیم کی جائے گی۔

شہباز شریف نے کہا کہ مستحق خاندانوں کو بینک اکاؤنٹس اور ڈیجیٹل والٹس کے ذریعے ادائیگیاں کی جائیں گی، اڑتیس ارب روپے ایک کروڑ اکیس لاکھ مستحق خاندانوں میں تقسیم کئے جائیں گے، ہر مستحق خاندان کو بلاامتیاز اور بلا تفریق 13000 روپے دیئے جائیں گے، پروگرام پر موثر عمل درآمد کیلئے اس کا تواتر سے جائزہ لوں گا۔

Follow Lahore News on Facebook

Install our App