(ویب ڈیسک ) بسنت تہوار کے دوران امن و امان اور شہریوں کی جان و مال کے تحفظ کو یقینی بنانے کے لیے لاہور میں بسنت کے تینوں دن دفعہ 144 نافذ رہے گی۔ انتظامیہ کے مطابق 18 سال سے کم عمر بچوں پر پتنگ بازی مکمل طور پر پابندی ہو گی، کم عمر بچوں کی جانب سے پتنگ بازی کی صورت میں والدین کو ذمہ دار اور قصوروار ٹھہرایا جائے گا۔

ضابطہ اخلاق کی خلاف ورزی پر سخت قانونی کارروائی عمل میں لائی جائے گی تاکہ بسنت محفوظ اور پرامن انداز میں منائی جا سکے۔

  پنجاب میں بسنت سے قبل پتنگ بازی کو محفوظ اور منظم بنانے کیلئے پتنگ اور ڈور تیار کی جا رہی ہے، فروخت کنندگان اور کائٹ فلائنگ ایسوسی ایشنز کی رجسٹریشن جاری ہے، بسنت 6، 7 اور 8 فروری کو ہوگی۔

ضلعی انتظامیہ کے مطابق پتنگ وڈور سازوں، فروخت اور ایسوسی ایشنز کی رجسٹریشن کیلئے چار کیٹیگریز کے فارم جاری ہوں گے۔ فارم اے پتنگ سازوں اور ڈور بنانے والوں کی رجسٹریشن کیلئے ہوگا۔ رجسٹرڈ افراد کو سرکاری سرٹیفکیٹ فارم بی کے ساتھ جاری کیا جائے گا جس پر کیو آر کوڈ درج ہوگا۔

فارم بی میں جاری کیو آر کوڈ ہی ڈور اور پتنگوں پر لگے گا، فارم بی سے حاصل کیا جانیوالا کیو آر کوڈ پتنگ و ڈور فروش کے پینا فلیکسز اور دکانوں پر درج ہوگا۔ فارم بی سرٹیفکیٹ دکان کے اندر نمایاں جگہ پر لگانا لازم ہوگا۔ پتنگ کا سائز 30 انچ لمبائی اور 34 انچ چوڑائی سے زائد نہیں ہوگی۔ گڈا کی لمبائی 34 انچ اور چوڑائی 40 انچ سے زائد نہیں ہوگی۔

ڈور کاٹن سے تیار کردہ دھاگے سے بنائی جائیگی جس میں نو سے زائد تاریں نہیں ہونگی۔ مانجا میں گلو، سادہ رنگ، آٹا اور کمزور شیشے کا استعمال کیا جا سکے گا۔ ڈور کیلئے صرف پنے کی اجازت ہوگی، چرخی نہیں بنائی جا سکے گی۔ تیز مانجا، تندی، دھاتی تار اور کیمیکل ممنوع ہوگی۔ کائٹ فلائنگ ایسوسی ایشنز کی رجسٹریشن کیلئے فارم سی اور فارم ڈی مختص کئے گئے ہیں۔ ضابطہ کار کی خلاف ورزی کرنے والوں کی رجسٹریشن منسوخ اور قانونی کارروائی کی جائے گی۔ صرف لاہور ضلع کی حدود میں تین روزہ محفوظ بسنت6، 7 اور 8 فروری 2026 کو ہوگی۔

بسنت کے تینوں دن دفعہ 144 کا نفاذ ہو گا، 18 سال سے کم عمر بچوں کے پتنگ بازی کرنے پر پابندی ہے، کم عمر بچوں کے پتنگ بازی کرنے پر والدین قصور وار ٹھہرائے جائیں گے، کائٹ فلائنگ آرڈیننس 2025 کے تحت والدین پر مقدمہ درج ہوگا، پتنگ بازی کیلئے 72 گھنٹے کا وقت دیا جائے گا، لاہور میں 100 کیمپس میں 10 لاکھ موٹرسائیکل سیفٹی راڈز اور وائر تقسیم کئے جائیں گے، محفوظ بسنت کیلئے لاہور ٹریفک انتظامیہ نے 23 روٹس پر فری رائیڈ کی تجویز دی ہے۔

تین روزہ محفوظ بسنت کے دوران سیفٹی راڈز کے بغیر کوئی موٹر سائیکل لاہور کی روڈز پر نہیں آئیگی، فائر ورکس اور ہوائی فائرنگ کرنے والوں کے خلاف کریک ڈاون ہو گا۔ کائٹ فلائنگ میٹیریل مینوفیکچرنگ کی اجازت بھی صرف ضلع لاہور میں ہوگی۔ کمشنر لاہور مریم خان کا کہنا ہے 6 فروری سے پہلے ضلع لاہور میں پتنگ بازی کی قطعا اجازت نہیں۔

Follow Lahore News on X

Install our App