(لاہور نیوز) وزیر اعلیٰ مریم نواز شریف کی ہدایت پر پنجاب کی تاریخ کا سب سے بڑا فلڈ سروے جاری کر دیا گیا۔

پنجاب ڈیزاسٹر مینجمنٹ اتھارٹی (پی ڈی ایم اے) کے مطابق سیلاب سے متاثرہ 27 اضلاع میں 1857 ٹیموں نے ڈیٹا اکٹھا کرنے میں حصہ لیا، فلڈ سروے میں 81510 متاثرین کی تفصیلات جمع کر لی گئی ہیں۔

پی ڈی ایم اے پنجاب کا کہنا ہے کہ سروے ٹیموں نے مختلف اضلاع میں 56207 کسانوں سے فصلوں کے نقصانات بارے جانچ پڑتال کی، اب تک سروے ٹیموں نے 53985 ایکڑ سیلاب متاثرہ اراضی کی نشاندہی کی ہے، سیلاب سے متاثرہ 24246 مکانات کا ڈیٹا جمع کر لیا گیا۔

مویشیوں سے محروم ہونے والے 1057 افراد سے بھی تفصیلات لی گئیں، مختلف اضلاع سے سروے کے مطابق 3945 ہلاک مویشیوں کی تفصیلات موصول ہوئیں، اربن یونٹ، ریونیو، محکمہ زراعت، لائیو سٹاک اور پاک فوج کے نمائندے گھر گھر جا کر سروے کر رہے ہیں۔

ڈی جی پی ڈی ایم اے عرفان علی کاٹھیا نے کہا کہ پی ڈی ایم اے پنجاب روزانہ کی بنیاد پر سروے میں پیش رفت کا جائزہ لے رہا ہے۔

سیلاب متاثرہ بزرگ شہری نے وزیر اعلیٰ پنجاب کے اقدامات کی تعریف کی اور دعاؤں سے نوازا، بزرگ شہری نے کہا کہ یقین ہے نواز شریف کی بیٹی متاثرین سیلاب کے نقصانات کا ازالہ کرے گی۔

بزرگ شہری نے وزیر اعلیٰ پنجاب اور میاں نواز شریف زندہ باد کے نعرے لگائے اور سروے ٹیموں کا شکریہ ادا کیا۔

پی ڈی ایم اے کے مطابق سروے ٹیمیں کشتیوں کی مدد سے بھی متاثرہ دیہات کا وزٹ کر رہی ہیں، کھڑے سیلابی پانی میں سے گزر کر متاثرین کا ڈیٹا ہر صورت یقینی بنایا جا رہا ہے، ضلعی انتظامیہ اور متعلقہ ادارے شفافیت کیلئے دن رات محنت کر رہے ہیں۔

Subscribe Lahore News on YouTube

Install our App